18 января 2014 г.
Район администрацийĕн пуçлăхĕ Ростислав Тимофеев январĕн 16-мĕшĕнче районти «Çĕнтерÿ ялавĕ» хаçат редакцийĕнче пулса курма кăмăл турĕ. Ăнсăртран мар, Ростислав Николаевич пичетĕн çăмăл мар ĕçĕнче вăй хуракансене Раççей тата Чăваш пичечĕсен кунĕсемпе саламларĕ, вĕсене хисеплĕ те кирлĕ ĕçре ăнăçусем, ырлăх-сывлăх сунчĕ.
Сăлтавĕ те çук мар темелле. Паянхи çăмăл мар вăхăтра Анатолий Тихонов ертсе пыракан коллектив республика шайĕпе танлаштарса пăхсан япăх мар ĕçлесе пырать, малалла тăвакан утăмсем, ÿсĕмсем те сулмаклă.
Район хаçачĕн тиражĕ пирки калас пулсан та çакнах çирĕплетмелле. Тираж çулран-çул ÿссе пырать. Кăçалтан унăн тиражĕ 4931 экземпляра çитрĕ. Республикăри ытти районсем хушшинче те ку виççĕмĕш кăтарту. Муркашсенчен малтисем Патăрьелсемпе Етĕрнесем кăна. Районта çынсен шучĕ чакса пынă вăхăтра «Çĕнтерÿ ялавĕ» хаçат тиражĕ ÿссе пырать пулсан район хаçачĕ çынсене кирлĕ, вĕсем ăна вулаççĕ, унта пичетленекен материалсем вĕсене интереслентереççĕ, чунĕсене çывăх.
Муркаш район хаçачĕ кăçалхипе пиллĕкмĕш хут Раççейри прессăн ылтăн фончĕн çĕнтерÿçи шутне кĕме тивĕçрĕ. Çакă та - коллектив ÿсĕм çулĕпе пынин курăмлă тĕслĕхĕ. Хаçат редакцийĕ республикăра ирттерекен конкурссене хутшăнса пĕрре кăна мар призерсен Дипломĕсемпе грамотисене, Тав хучĕсене тивĕçрĕ.
Хаçат сотрудникĕсем хальхи çĕнĕ технологи мелĕсене алла илессипе çине тăрса ĕçлеççĕ, хăйсен професси ăсталăхне ÿстерсех пыраççĕ.
Çак саманта асăнса хăварни те пысăк пĕлтерĕшлĕ. Ытларах укçа-тенкĕне хаçат редакцийĕ хăйĕн вăйĕпе ĕçлесе илме тăрăшать. Çапла майпах тăтăшах пичет тата компьютер оборудованийĕсене çĕнетсе пырать. Юлашки икĕ çул хушшинче кăна редакци çуртĕнче 1 млн. тенкĕлĕх юсав ĕçĕсем туса ирттерме палăртаççĕ. Кабинетсенче хăтлă, ăшă, тирпейлĕ.
Юлашкинчен район администрацийĕн пуçлăхĕ Ростислав Тимофеев пичет ĕçĕнче уйрăмах палăрнисене район администрацийĕн Хисеп грамотине парса чыс турĕ, малашне те ăнăçлă ĕçлеме ырлăх-сывлăх сунчĕ.
В. ШАПОШНИКОВ.