22 января 2014 г.
Пĕрремĕш ларура
Тунти кун, январĕн 20-мĕшĕнче, РФ Шалти ĕçсен министерствин районти пайĕ çумĕнчи обществăлла канаш членĕсем кăçалхи пĕрремĕш ларăвне ирттерчĕç. Маларах çирĕплетнĕ ĕç планне тепĕр хут тишкерсе йĕркелÿ саманчĕсене сÿтсе яврĕç. Лару вăхăтĕнче канаш членĕсем вăхăтлăх тытмалли изоляторти условисемпе паллашрĕç. Кунти пурăнмалли условисем, апатлану, йĕрке саккунпа килĕшсе тăнине палăртрĕç вĕсем.
Ларăва шалти ĕçсен пайĕн пуçлăхĕ Е. Плечов та хутшăнчĕ. Вăл иртнĕ çулхи кăтартусемпе паллаштарчĕ, пайăн кулленхи ĕçĕ-хĕлĕ çинче чарăнса тăнă май пирĕн полицейскисем Чăваш Республики тăрăх РФ Шалти ĕçсен министерствин спартакиадин пĕтĕмлетĕвĕпе 3-мĕш вырăна тухнине пĕлтерчĕ. Кунсăр пуçне çак кунсенче Е. Плечова Чăваш Республики тăрăх федерацин тĕп инспекторĕ Г. Федоров саккунлăхпа йĕркелĕхе çирĕплетессине пысăк тÿпе хывнăшăн Тав çырăвĕ парса чысланă.
Тимлĕх - тĕрлĕ енлĕ
Хĕрарăмсен районти канашĕ тата нумаях пулмасть йĕркеленнĕ тепĕр обществăлла пĕрлешÿ - ашшĕсен районти канашĕ çак кунсенче хăйсен ĕç планне çирĕплетрĕç.
Районти йывăр лару-тăруллă çемьесене пулăшасси, ачасене хÿтлĕхпе тивĕçтересси, тĕрлĕ ÿсĕмри çынсене обществăлла пурнăçа активлăрах явăçтарасси тата ытти ыйтусемпе ĕçлеме хатĕррине палăртрĕç канашсен членĕсем. Хĕрарăмсен канашĕн ертÿçи Л. Тарасова каланă тăрăх çакăнпа пĕрлех вĕсем вырăнсенчи хĕрарăмсен канашĕсен ĕçĕ-хĕлĕ çине тата мероприятисене тĕрлĕ интереслĕ формăпа ирттересси çине пысăкрах тимлĕх уйăрма тивĕç.
Кубок - кил хуçисенче
Кăçалхипе вун саккăрмĕш хут «Оринино» хуçалăхăн кубокне çĕнсе илекенсем пĕрле пухăнчĕç. Ырă йăлана кĕнĕ ăмăртура январĕн 18-мĕшĕнче 10 команда вăй виçнĕ.
Ăмăртăва хутшăнакансем яланхи пекех шашка тата шахмат вăййисенче, волейболра вăй виçнĕ. Спортăн кашни енне уйрăм пĕтĕмлетнĕ. Кăтартусен пĕрлештерĕвĕ вара Орининсем мала тухнине çирĕплетсе панă.Иккĕмĕш вырăнта Мăн Сĕнтĕрти вăтам шкулăн команди, виççĕмĕшĕнче - Нискассинчи вăтам шкулăн команди.
Н. Николаева хатĕрленĕ.