26 февраля 2014 г.
Пирĕн районта массăллă спорта аталантарассипе чылай ĕç пурнăçланать. Çак тĕллевпех çулталăк тăршшĕпе чылай ăмăрту иртет.
Иртнĕ шăмат кун, февралĕн 22-мĕшĕнче, Социализмла Ĕç Геройне Е. Андреева асăнса йĕлтĕрçĕсен ăмăртăвĕ иртрĕ. Унта пурĕ 22 команда хутшăнчĕ. Ăмăрту уçă шайра иртнĕрен Муркаша кÿршĕри Элĕк районĕнчен тата Мари Республикинчи Горномари районĕнчен килнисем те пулчĕç. Малти вырăнсене Çатракасси ял тăрăхĕн, Калайкассинчи вăтам шкулта тата Атапайри тĕп шкулта вĕренекенсен командисем йышăнчĕç. Мала тухнă ветерансене те уйрăммăн чысларĕç.
Çак кунах Муркашри çамрăк техниксен станцийĕнчи картинг секцине çÿрекенсем хăйсен пултарулăхне Е. Андреев хуçалăхăн йĕтемĕ çинче тĕрĕслерĕç. Чуманкасси ял тăрăхĕнче вара пулăçăсем ăмăртрĕç.
Каласа хăвармалла, февралĕн 22-мĕшĕнче республикипех Пĕрлехи сывлăх кунĕ пулчĕ. Çавăнпа та пирĕн районти ачасемпе çамрăксен шкулĕ - «Сывлăх» ФСК-ра уçă алăксен кунĕ иртрĕ. Кунта кашни çын тĕрлĕ услугăпа тÿлевсĕр усă курма пултарчĕ.
Вырсарни кун, Тăван çĕр-шыв хÿтĕлевçин кунĕнче, «Росгосстрахăн» Чăваш Енри филиалĕн куçса çÿрекен кубокне çĕнсе илессишĕн волейбол ăмăртăвĕ иртрĕ. Ытти çулсенчи пекех ку ăмăртăва йышлăн пухăнчĕç - пурĕ 13 команда: Шупашкартан та, Мари Республикинчен та килнĕ. Кубока вара «Ремисс» команда çĕнсе илчĕ.
Февралĕн 23-мĕшĕнчех Муркашри вăтам шкулти тирта пĕчĕк калибрлă винтовкăран тĕл перекенсен ăмăртăвĕ иртрĕ. Çак ăмăртăва служба тивĕçне пурнăçланă чух пуçне хунă милици майорне Владимир Федорова асăнса кашни çулах ирттереççĕ. Кăçал унта районти ĕç коллективĕсен 11 команди хутшăнчĕ. Пĕлтĕрхи пекех «Сеспель» предприяти команди мала тухрĕ.