22 февраля 2014 г.
Чăваш Ен Информаци политикипе массăллă коммуникацисен министерствин коллегийĕн анлă ларăвĕнче СМИ отраслĕпе IT-сферăн 2013 çулхи итогĕсене пĕтĕмлетрĕç. Валентина Андреева министр чăваш журналисчĕсен ĕçне федераци тата регион шайĕнче пысăка хурса хакланине палăртрĕ. 9 сотрудник Раççей Çыхăну министерствин грамотине тивĕçнĕ. 10 издани – «Золотой фонд прессы» Пахалăх паллине. Министр отрасль ĕçченĕсене ырми-канми вăй хунăшăн тав турĕ.
Массăллă информаци хатĕрĕсен, кĕнеке кăларас тата полиграфи ĕçне министр çумĕ Любовь Шемарина тишкерчĕ. Иртнĕ çулхи декабрĕн 17-мĕшĕнче «Тăван радио» хута кайнине пĕлтерĕшлĕ пулăм тесе палăртрĕ вăл.
Пичет изданийĕсене сарас ĕçе те хускатрĕç коллеги ларăвĕнче. Республика, район хаçат-журналĕсен тиражĕ 153,5 пин экземплярпа танлашнă.
Коллеги ларăвĕнче Муркаш район хаçачĕн коллективĕн ĕçне те лайăххипе палăртрĕç. Коллектив мĕн пур тупăшăн 69 процентне хăй ĕçлесе илнĕ. Пĕрремĕш вырăнта ку енĕпе Вăрнарсем – 75 процент. Вăтам ĕç укçи шайĕпе те Муркашсем малти ретре. Хаçат тиражĕпе Муркашсем виççĕмĕш вырăнта, Патăрьелсемпе Етĕрнесем хыççăн.
Пирĕн республикăра кашни пин çын пуçне 312 экземпляр пичет изданийĕ тивет. Ку Атăлçи округĕнче – 3-мĕш кăтарту, Раççейре – 9-мĕш. Апла пулсан ентешсем хаçат-журнал вулама кăмăллаççĕ тесе çирĕппĕнех калама пулать.
2014 çул та ăнăçлă пуласса шанса вăй хуратпăр теççĕ Муркаш журналисчĕсем коллеги ларăвĕн итогĕсемпе паллашнă май.
Хамăр инф.