12 января 2013 г.
Юлашки çулсенче Муркаш тăрăхĕнче хоккей анлă сарăлса пынине палăртмалла. Пĕлтĕр пирĕн районти çамрăк хоккеистсем Можайск хулинче иртнĕ Раççей ăмăртăвĕ таранах «ÿсме пултарни» уйрăмах савăнтарать. Çак ăмăртусене тухмалли сукмак вара спортри ăсталăха кунсерен туптанипе тата вырăнти ăмăртусене хутшăннипе таптанать.
Акă январĕн 4-мĕшĕнче çамрăк хоккеистсем Сыпай ялĕнче пуçтарăнчĕç. Ачасемпе çамрăксен районти спорт шкулĕн Муркашри, Юнкăри тата Сыпайри уйрăмĕсенче вĕренекенсем «Перекет банкĕ» акционерсен уçă пĕрлешĕвĕн Чăваш Енри 8613 " уйрăмĕн 8613Ÿ039 " хушма офисĕн (Муркашри) куçса çÿрекен кубокне çĕнсе илессишĕн вăй виçрĕç. 1998 çулта çуралнисем тата кĕçĕнреххисем пăр çинче хĕрÿ вăйăсем кăтартма пултарни вĕсен ăсталăхĕ чăнах та ÿссе пынине, ачасен мал туртăмлăх пуррине çирĕплетет. Вĕсен хавхаланăвне сÿнме памалла мар кăна. Çакна шута илсе ĕнтĕ районти нотариус П. Шлаев та ачасен хоккей вăййине аталантарма тесе ăмăртăва укçа тÿпи хыврĕ, С. Яргеев индивидуаллă предприниматель те спонсорла пулăшу кÿчĕ.
Ăмăрту спорт шкулĕн Сыпайри уйрăмĕнчи команди вăйлăрах та хăвăртрах пулнине кăтартса пачĕ. Перекет банкĕн хушма офисĕн ертÿçинчен Ю. Ивановран кубок илме тивĕç пулнипе Сыпайсем савăнчĕç те, хăпартланчĕç те. Иккĕмĕш вырăнта – Юнкăри уйрăмăн команди, виççĕмĕш вырăнта – Муркашсен команди. Вăйăсенче «Чи лайăх вратарь» ята Майкл Потапов (Муркаш) тивĕçрĕ, «Чи лайăх хÿтĕлевçĕ» – Алексей Шандимиров (Юнкă), «Чи лайăх тапăнакан» – Роман Куликов (Муркаш), «Чи лайăх бомбардир» – Павел Шишкин (Сыпай). Ку ăмăртупа ачасен хоккей сезонĕ вĕçленмен-ха. Çулталăка çапла ăнăçлă пуçлани малалла та кăмăла пусăрăнма памассине çирĕппĕнех калаççĕ хоккеистсем.
Н. ДИМИТРИЕВА.