07 декабря 2013 г.
Муркашра - Мари Элсем
Çак эрнере районти ачасен пултарулăх çурчĕн хушма пĕлÿ паракан педагогĕсем хăйсен Козьмодемьянскри ĕçтешĕсемпе тĕл пулчĕç. Семинар ĕç калăпăшĕпе питĕ анлă пулнă: педагогсен мастер-класĕсем, каласа панисем, презентацисем ачасене хушма пĕлÿ панин пĕлтерĕшне тарăннăн уçса панă. Районти ачасен пултарулăх çурчĕн директорĕ А. Рожкова, ача-пăча искусство шкулĕн директорĕ О. Григорьева тата ачасемпе çамрăксен районти спорт шкулĕ - «Сывлăх» ФСК директорĕ А. Куликов асăннă учрежденисен ĕçĕпе паллаштарнă.
Мари Эл Республикинчен килнĕ хăнасем Муркашри вăтам шкулти «Родничок» сывлăх центрĕнче те пулса курнă, çĕнĕ çул уявĕ валли ташăсем вĕренме те ĕлкĕрнĕ.
Тата виçĕ предприниматель
Ĕçсĕр çынсен ретĕнчи граждансене харпăр хăй ĕçне пуçарма Муркашри халăха ĕçпе тивĕçтерекен центр пулăшать: кунта вĕсене консультаци те параççĕ, предприниматель пуçарулăхĕ пуррине ятарлă тестсем урлă пĕлме пулăшаççĕ, çĕнĕ професси илме курссене вĕренме яраççĕ.
Декабрь пуçламăшĕ тĕлне çакăн пек пулăшупа пирĕн районти 19 çын усă курнă, вĕсенчен 15-шĕ «Харпăр хăй ĕçне мĕнле пуçармалла» тренинг семинара та хутшăннă. Ĕçсĕр 3 çынна ĕç пуçарма финанс тĕлĕшĕнчен 58800-шер тенкĕ пулăшу кÿнĕ. Çапла вара çак виçĕ çын офис машинипе техникине юсассипе тата пăхса тăрассипе, мăйракаллă шултра выльăх ĕрчетессипе, парикмахер тата илем салонĕн услугисемпе тивĕçтерессипе ĕç пуçарнă.
Настьăсем нумайрах
Вун пĕр уйăхра пирĕн районта 191 арçын ача тата 192 хĕр ача çуралнине регистрациленĕ. Ашшĕ-амăшĕ пепкисем валли Анастасия (14), Валерия (13), Егор (12) тата Кирилл (12) ятсем суйланă мĕн. Ачасем ытларах Москакасси (47), Муркаш (46) тата Çатракасси (34) ял тăрăхĕсенче çурални паллă.
Пурнăçран уйрăлакансем вара çут тĕнчене килекенсенчен чылай нумайрах - 494 çын. Хĕрарăмсем вăтамран 76 çулта вилнĕ пулсан, арçынсем - 61 çулта.
Асăннă тапхăрта районта 176 çĕнĕ çемье йĕркеленнĕ, анчах та 82 çемье арканнă.
Сайтсем тупăшаççĕ
Ял тăрăхĕсен сайчĕсен конкурсĕ кăçалхипе пирĕн районта тăваттăмĕш хут иртет. Çитес çулхи январĕн 31-мĕшĕччен пыракан кăçалхи конкурса район 70 çул тултарнине халалланă.
Конкурс «Чи лайăх дизайнлă сайт», «Çынсем чи нумай усă куракан сайт» тата «Тăван кĕтес пирки каласа паракан чи лайăх сайт» номинацисемпе иртет.
Çĕнтерÿçĕсене тĕрĕс палăртас тĕллевпе сайтсене сахал мар критерипе хаклаççĕ.
Шкулта - паралимпиецсем
Чуманкассинчи вăтам шкулта ачасем валли интересли питĕ нумай. Акă иртнĕ кунсенче вĕсем патне хăнана тĕнчипе паллă паралимпиец спортсменсем килсе кайрĕç: бадминтон енĕпе Раççей спорт маçтăрĕ, темиçе хут Раççей чемпионĕ, Европа чемпионачĕн кĕмĕл тата тĕнче чемпионачĕн бронза призерĕ Юрий Степанов тата Раççей спорт маçтăрĕ, темиçе хутчен Европăпа тĕнче чемпионĕ Павел Попов шкулта ятарлă мастер-класс ирттернĕ. Спортсменсем хăйсем хушшинче те, ачасемпе те бадминтонла выляса кăтартнă.
Хускану тăвас енĕпе чикĕленнине пăхмасăрах çак спортменсем паян пысăк спортра. Çавăнпах кун пек çынсем паралимп юхăмĕ çинчен никамран интереслĕ каласа панă. Спортсменсен тренерĕ - ЧР тава тивĕçлĕ тренерĕ Г. Сергеев тата бадминтон енĕпе Чăваш Ен чемпионĕ Денис Евстафьев та ачасемпе калаçăва хутшăннă.
Н. Николаева хатĕрленĕ.