21 декабря 2013 г.
Ĕçе илме - квота
Раççей Федерацийĕн «О социальной защите инвалидов» саккунне кĕртнĕ улшăнусемпе килĕшÿллĕн 2013 çулхи ноябрĕн 25-мĕшĕнчи 68 номерлĕ «О квотировании рабочих мест для инвалидов в Чувашской Республике» саккунĕн 2 тата 4 пайĕсене улшăнусем кĕртесси çинчен» 81 номерлĕ саккунне йышăнчĕç. Унпа килĕшÿлĕн 35-100 çын ĕçлекен организацисенче инвалида ĕçе илмелли квота ĕçлекенсен вăтам хисепĕн 1,5 проценчĕпе танлашмалла. Пирĕн районта çакăн пек организаци пурĕ 17.
Çак йыша кĕрекен предприяти-организацисен, учрежденисен ертÿçисемпе Муркашри халăха ĕçпе тивĕçтерекен центр кĕçнерни кун канашлу ирттерчĕ. Канашлăва районти социаллă хÿтлĕх пайĕн ертÿçи В. Аникина, прокурор пулăшаканĕ П. Макеев та хутшăнчĕç.
И. Димитриева кĕскен центр ĕçĕ-хĕлĕ пирки каласа панипе пĕрлех çĕнĕлĕх çинче тĕплĕн чарăнса тăчĕ. Саккунпа паллашнă май пухăннисем инвалид çынна ĕçе илме мĕнпе никĕсленмеллине, саккуна пăхăнманшăн мĕнле явап палăртнине тата ытти чылай ыйтăва сÿтсе яврĕç.
Донорсем сахал мар
Районта донор кунĕсем малалла пыраççĕ. Декабрĕн 17-мĕшĕнче Нискассинчи пĕтĕмĕшле практика врачĕн офисне ку тăрăхри 80 çын юн пама пынă. Декабрĕн 18-мĕшĕнче Турай ял тăрăхĕнче çак тĕллевпе 60 çын пуçтарăннă. Вĕсене пурне те пысăк опытлă фельдшерсемпе вăтам медицина персоналĕ йышăннă.
Кашни донор 329 тенкĕ тата вăтам ĕç укçине тÿлесе икĕ кунлăх ĕçрен хăтарма ирĕк паракан справка илнĕ.
Кубок - Орининсенче
Депутатсен районти Пухăвĕ çумĕнчи çамрăксен парламенчĕн кубокне çĕнсе илессишĕн «Сывлăх» физкультурăпа спорт комплексĕнче волейбол ăмăртăвĕ иртнĕ. Ăмăртăва Оринин, Москакасси, Уйкас Янасал, Катькас, Ярапайкасси тата Çатракасси ял тăрăхĕсен командисем хутшăннă. Хĕрÿ вăйăсенче Оринин тăрăхĕнчи çамрăксем ыттисенчен нумайрах очко пухса мала тухма пултарнă, кубока тивĕçнĕ. Иккĕмĕшпе виççĕмĕш вырăнсене тухса Москакасси тата Ярапайкасси тăрăхĕсенчи çамрăксем медальсемпе грамотăсене тивĕçнĕ.
Теттесем хатĕрлĕр
Районта «Çĕнĕ çулхи тĕлĕнтермĕш - хамăр алăпа» конкурс пуçланчĕ. Ăна районти ача-пăча пултарулăх çурчĕ йĕркеленĕ. Çак интереслĕ конкурса пур шкул ачи те, вĕсен ашшĕ-амăшĕ те, педагогсемпе воспитательсем те хутшăнма пултараççĕ, анчах та Интернетран «вăрланисене» жюри хаклава кĕртмест. Апла пулсан кашни хутшăнакан хăйĕн пултарулăхне ытларах уçса пама пултарать.
Çĕнтерÿçĕсене тĕрлĕ номинацире палăртĕç. Ĕçсене декабрĕн 30-мĕшĕччен йышăнаççĕ. Чи лайăх ĕçсене кайран Муркашри Тури чăвашсен музейĕнче курма пулĕ.
Н. Николаева
хатĕрленĕ.