16 ноября 2013 г.
Паянхи пурнăçа 10 - 15 çул каяллахипе танлаштараймăн. Тĕрлĕ улшăнусем, çĕнĕлĕхсем кунсерен пурнăçа кĕрсе пыраççĕ. Пур чухне ĕлкĕрсе пыма та йывăр темелле. Интернетах илер. Халĕ шкул çулне çитмен ачаран тытăнса çулланнă пенсионер таранах ытларахăшĕ унпа паллашнă кăна мар, активлă усă курать те. Район администрацийĕн информаципе тивĕçтерекен пайĕн пуçлăхĕпе Валерий ЛАВРЕНТЬЕВПА тĕл пулнă май район хаçачĕн сотрудникĕ В. ШАПОШНИКОВ çак çĕнĕлĕхсем пирки сăмах пуçарма сĕннĕ:
- Чăннипех ĕнтĕ Интернет юлашки вăхăтра чылай çыншăн пурнăçăн уйрăлми пайĕ пулса тăчĕ тесен те тĕрĕсех. Тĕрлĕрен чылай ыйтăва татса панă чухне унпа анлă усă куратпăр: ĕç çырăвĕсем çÿретессинчен тытăнса кулинари рецепчĕсем шырасси таранах. Хальхи вăхăтра информаци технологийĕсем пирĕн обществăн пур сферинче те тарăн тымар яма ĕлкĕрчĕç, вĕсем хамăрăн пурнăç шайне чылай лайăхлатма пулăшаççĕ.
Паянхи калаçура эпĕ Муркаш район администрацийĕн Интернетăн глобальнăй сетĕнчи официаллă информаци ресурсĕ çинче чарăнса тăрасшăн. Влаç халăхшăн уçă та курăмлă пулмалла. Район администрацийĕн пуçлăхĕн Ростислав Тимофеевăн ĕç принципĕ çакăн пек. Район администрацийĕн информаципе тивĕçтерекен пайĕн тĕп задачисенчен пĕри - çак принципа пурнăçа кĕртме пулăшасси - район администрацийĕн ĕçне-хĕлне Муркаш районĕн официаллă сайчĕ урлă çутатса тăрасси.
Район администрацийĕн официаллă сайчĕ информаци пулăшăвне федерацин тата Чăваш Республикин законодательствисемпе килĕшÿллĕн илсе тăрать. Пирĕн сайта пурте усă курма пултаракан ресурс шучĕпе Интернет сечĕн пĕрлехи информаци уçлăхне кĕртнĕ. Сетьри унăн адресĕ wwwĕmorgauĕcapĕruĕ Информаци ресурсĕ пурин валли те уçă, Интернетăн информаци сечĕпе усă куракансене районти хăй тытăмлăх органĕсем пирки тулли тата актуаллă информаципе тивĕçтерет.
Информацисене куллен, сехетсерен, вăл шутра канмалли тата уяв кунĕсенче те çĕнетсе тăраççĕ. Сайта кĕрекенсем тата унпа усă куракансем çĕнĕ хыпарсем кăна мар, вĕсемпе çыхăннă фото- тата видеоматериалсем те кĕтеççĕ. Çавăнпа та эпир вăхăтпа тан пыма тăрăшатпăр, хыпарсене ытларах чухне фото-, видеоматериалсемпе пĕрле вырнаçтаратпăр.
Районăн официаллă Интернет-ресурсĕпе интересленекенсем уйăхсерен 80 пинрен тытăнса 105 пин çын таран. Кусем вĕсем районта, республикăра, Раççейре, кунпа пĕрлех чикĕ леш енче пурăнакансем те. Вĕсенчен нумайăшĕ пирĕнпе ĕç çырăвĕсем çÿретет, хăнана та кĕрсе тухать. Вĕсем официаллă сайтри хыпарсемпе хаваспах паллашаççĕ, район хаçатне вулаççĕ, Чăваш Ен Наци радиовĕн эфирĕнче районăн радиопередачисене итлеççĕ.
Районăн официаллă сайтĕнчи информаци материалĕсемпе Чăваш Республикин влаç органĕсен официаллă порталĕ, республикăра тухса тăракан «Советская Чувашия», «Хыпар» хаçатсем, Чăваш радиовĕ тата телевиденийĕ час-часах усă кураççĕ.
Сайт пайĕсене вăхăтра çĕнетсе тăрас, материалсене ăста тата интереслĕ вырнаçтарас тесен район администрацийĕн службисемпе тата пайĕсемпе вĕçĕмех тачă çыхăнса ĕçлени кирлĕ. Май килнипе усă курса пирĕнпе тачă çыхăну тытакан «штатра тăман корреспондентсене» асăнса хăварма кăмăл пур. Кусем вĕсем Чуманкасси, Калайкасси, Юнкă шкулĕсем, «Солнышко» тата «Путене» ача сачĕсем.
Ял тăрăхĕсен официаллă сайчĕсене йĕркене кĕртсе çитерессипе туса ирттермелли ĕçсен калăпăшĕ пĕчĕк мар-ха. Кăçал çĕнĕ программа продуктне (порталсен конструкторне) пурнăçа кĕртнĕ хыççăн хăш-пĕр ял тăрăхĕсен администрацийĕсем хăйсен информаци ресурсĕсемпе тăнăç ĕçлессине майлаштарса çитереймерĕç. Çак çитменлĕхсене пĕтерес тесе ял тăрăхĕсен официаллă сайчĕсемпе ĕçлессин ыйтăвĕсемпе кунти специалистсемпе тăтăшах консультацисем ирттерме тивет. Асăрхаттарусемпе сĕнÿсем паратпăр, уйăхсерен сайтсен рейтингне ирттеретпĕр. Ял тăрăхĕсен официаллă сайчĕсемпе вĕçĕм тата активлă ĕçлеме хавхалантарас тĕллевпех кăçалхипе тăваттăмĕш хут ял тăрăхĕсен официаллă сайчĕсен конкурсне ирттеретпĕр. Ăна района йĕркеленĕренпе 70 çул çитнине халалланă. Хамăр район историйĕпе çыхăннă çĕнĕ те интереслĕ фото-, видео- тата информаци материалĕсем кĕтетпĕр.
Ку хутĕнче конкурс итогĕсене пĕтĕмлетнĕ чухне жюри материалсем вырăнти хăй тытăмлăх органĕсен ĕçне-хĕлне информаци енĕпе мĕнле çутатнин, çынсене патшалăх тата муниципалитет услугисемпе электрон мелĕпе тивĕçтересси мĕнле пулса пыни пирки пĕлтерсе тăнин, хамăр тăрăхри йăла-йĕркесемпе традицисене сыхласа хăварас тата аталантарас енĕпе материалсем вырнаçтарнин ыйтăвĕсем çине ытларах тимлĕх уйăрĕ. Района йĕркеленĕренпе 70 çул çитнине уявлама хатĕрленнĕ май тата районта пурăнакансем хушшинче киноискусствăна пропагандăлас, унăн сумне ÿстерес, Муркаш районĕн видеоархивне хатĕрлес тĕллевпе районта иккĕмĕш хут видеосюжетсен «Сам себе режиссер» конкурсне ирттеретпĕр. Чылайăшĕ кун пек видео- тата фотоконкурссене хаваспах хутшăнать. Кăçал та районта пурăнакан кашни çын валлиех конкурссен тĕрлĕ номинацийĕсенче хăйсен майĕсене кăтартма, район историйĕнче йĕр хăварма май пур.
Кăçалхи декабрь уйăхĕнче эпир сăн ÿкерчĕксен çулталăк пуçламăшĕнче палăртнă «Лучше нет родного края» конкурсĕн итогĕсене пĕтĕмлетĕпĕр. Ăна та района йĕркеленĕренпе 70 çул çитнине халалланă. Конкурс тĕллевĕсем - районти шкул ачисен тата районта пурăнакансен граждан, общество тата пултарулăх активлăхне ÿстересси, патриотизм, хăйсен пĕчĕк Тăван çĕр-шывне юратассин туйăмне аталантарасси, фотоискусствăна пропагандăласси тата çынсем хушшинче сарасси.
Хĕрарăмсен районти канашĕ депутатсен районти Пухăвĕ ырланипе сăн ÿкерчĕксен «В объективе - женщина села» конкурсне ирттересси пирки пĕлтерчĕ. Районти хĕрарăмсем пирки каласа памалли вара пирĕн сахалах мар.
Район хаçачĕн редакцийĕ район администрацийĕн информаципе тивĕçтерекен пайĕпе пĕрле кăçал пĕрремĕш хут çамрăк журналистсем валли «Муркаш районĕ: истори çамрăксен куçĕпе» конкурс ирттерме йышăнчĕ.
Палăртнă конкурссен пур материалĕсене те пирĕн официаллă сайтра вырнаçтарнă.
Районта пурăнакансене пурне те, миçе çултине, ăçта пурăннине, ăçта ĕçленине пăхмасăр пирĕн конкурссене активлă хутшăнма чĕнсе калатăп. Вĕсем историшĕн пĕлтерĕшлĕ, район 70 çул тултарнине халалланăскерсем. Васкăр, парнесем кĕтеççĕ сире!