16 ноября 2013 г.
Туслăх çирĕпленет
Çак кунсенче пирĕн района Севастопольти чăваш наци обществин пуçаруçи, Крым Автономи Республикинчи Чăваш наци обществин председателĕ, Крыма кăмăллакансен Чăваш клубĕн президенчĕ Г. Степанов тата Чăваш Ен суту-илÿ экс-министрĕ Ю. Алексеев килнĕ. Вĕсем район администрацийĕн пуçлăхĕпе Р. Тимофеевпа тĕл пулнă. Вăл килĕшÿ çине алă пуснипе вĕçленнĕ. Тĕп ыйтусем шутĕнче чăваш наци культурине сыхласси, аталантарасси, туризм ĕç-хĕлне вăйлатасси, ача-пăча канăвне йĕркелесси тата ытти те. Палăртса хăвармалла, Г. Степанов Исетерккĕ çынни, çавăнпа та тăван тăрăх шăпи уншăн пысăк пĕлтерĕшлĕ.
Татьяна кинемей 90 çулта
Оринин ял тăрăхĕнчи Сентимĕрти Татьяна Константиновна Андреева 90 çул тултарчĕ. Çавна май паллă кун ячĕпе ăна район администрацийĕн пуçлăхĕ Р. Тимофеев парнесем парса саламларĕ, РФ Президенчĕн тав çырăвĕпе чысларĕ. Çак ял тăрăхĕн пуçлăхĕ А. Волков вара юбиляра тутăр çыхса ячĕ. Уява ыттисем те хутшăнчĕç.
Техникăна - хĕл управне
Ял хуçалăх техникине хĕл управне лартассине кирлĕ пек йĕркелесси - чи çивĕч ыйтусенчен пĕри. Çавна май ку тĕлĕшпе çулсеренех смотр-конкурс йĕркелеççĕ. Республика шайĕнче «Путь Ильича» агрофирма ку енĕпе иккĕмĕш вырăна тивĕçрĕ.
Аслă ăрурисене - тĕслĕхе
Аслă ăрури çынсем обществăлла тĕрлĕ ĕçе питĕ активлă хутшăнаççĕ, вĕсем халăх йăли-йĕркине упрама тата тăсма тăрăшаççĕ, кирлĕ сĕнÿсем параççĕ. Ноябрĕн 13-мĕшĕнче районти социаллă хÿтлĕх пайĕ пулăшнипе инвалидсен обществин членĕсем экскурси ирттерчĕç, Каршлăх тăрăхĕнче тата «Сеспель» предприятире пулчĕç.
Ача амăшĕсем вĕреннĕ
Виçĕ çулччен ача пăхакан отпускри, çитес вăхăтра ĕçе тухма хатĕрленекен хĕрарăмсемпе социаллă тĕрев парас тĕлĕшпе ĕçпе тивĕçтерекен районти центр професси вĕрентĕвĕ ирттернĕ. Ятарлă программăпа килĕшÿллĕн кăçал 13 хĕрарăма вĕрентме палăртнă.
Асăннă категори кăмăлне кура 13 çынна çак ĕçе явăçтарнă та ĕнтĕ: 9 çын вĕренĕве вĕçленĕ, 4-шĕ малалла тăсаççĕ. Вĕсем тăватă тĕрлĕ професси алла илнĕ.
Интернет хăрушсăр пултăр
Интернет тĕрлĕ информаципе пуян, унпа усă курасси уйрăмах ачасемпе çамрăксемшĕн кăсăклă. Ун урлă тĕрлĕ информаци, вăл шутра сиенлисене те илме пултараççĕ. Анчах епле-хе хамăр ачасене усал информацирен хÿтĕлемелле;
Шурча шкулĕнче информатика урокне вĕрентекен Н. Тюрина «Интернета пĕрле хăрушсăрлăрах тăвар» медиахăрушсăрлăх сехечĕ ирттернĕ. Калаçу вăхăтĕнче тĕрлĕ ыйтăва хускатнă.
Сывă пурнăç йĕркишĕн
Спортпа туслă çын пур енлĕ аталанать. Калайкасси шкулĕнче ку тĕлĕшри тĕрлĕ ĕçе ирттересси ырă йăлана кĕнĕ ĕнтĕ. Кунта вĕренĕвĕн кашни кунĕ ирхи гимнастикăран пуçланать. Вăл виçĕ лаптăкра ку енĕпе ответлă ĕçченсем хутшăннипе иртет.
Р. Илларионова хатĕрленĕ.