13 ноября 2013 г.
Чăваш Енре пурăнакансен малашне регион законодательствине лайăхлатас ĕçе тÿрремĕнех хутшăнма май пур. «Раççей общество пуçарăвĕ» çĕнĕ портал йĕркелени çапла тума май парать.
Çак Интернет-ресурса Раççей Президенчĕн Указĕпе килĕшÿллĕн 2013 çулхи апрель уйăхĕнче туса хунă. Çавăнтанпа кăмăл пуррисем пурте çĕр-шывăн социаллă пурнăçпа экономика аталанăвĕн ыйтăвĕсемпе çыхăннă сĕнĕвĕсене сайта вырнаçтарма, унсăр пуçне маларах тăратнă пуçарусене ырлама пултараççĕ. Ноябрĕн 1-мĕшĕнчен тытăнса вара федераци шайĕнчи çеç мар, регион влаçĕсем валли те сĕнÿсем тăратма май тупăннă. Ку утăма тăвас тесен малтан патшалăх пулăшăвĕсен пĕрлехи порталĕнче регистрациленмелле.
«Раççей общество пуçарăвĕ» порталта ку е вăл пуçару тĕлĕшпе сасăлав çулталăка пырать. Сĕнĕве влаç органĕсем пăхса тухчăр тесен уншăн мĕн чухлĕ çын сасăлани кирлĕ. Федераци шайĕнчи пуçарушăн 100 пин сасă пухмалла, регион тата муниципалитет шайĕнче ку вăл çынсен пĕтĕм хисепĕн 5 проценчĕпе танлашать. Хыççăн асăннă пуçарăва эксперт ушкăнĕ пăхса тухать те ăна пурнăçа кĕртессипе йышăну тăвать.
Чăваш Енре регион шайĕнчи эксперт ĕç ушкăнне Чăваш Республикин Министрсен Кабинечĕн йышăнăвĕпе 2013 çулхи августăн 5-мĕшĕнче туса хунă. Унăн йышне влаç органĕсен представителĕсене, республика Патшалăх Канашĕн депутачĕсене, Общество Палатин, патшалăх учрежденийĕсен, бизнес обществисемпе общество пĕрлешĕвĕсен представителĕсене кĕртнĕ.
Ноябрĕн 6-мĕшĕ тĕлне порталта общество пуçарăвĕсене 2550 вырнаçтарнă. Вĕсем хушшинче чи анлă сарăлнисем - ятарлă сигнал вырнаçтарнă автомашинăсене (оперативлă служба автотранспорчĕсĕр пуçне) çул çинче пĕр чăрмавсăр çÿреме чарасси (81,7 пин сасă), çынна хăйне хăй хÿтĕлесе тунă преступленишĕн айăплас марри (80,6 пин сасă), çул-йĕр правилисене пăсакансем тĕлĕшпе уголовлă ĕç пуçарма видеоçыравпа усă курма май туса парасси (66,3 пин сасă).
Чăваш Енре пурăнакансенчен хальлĕхе 1 сĕнÿ пулнă - Шупашкар шыв хранилищин шайне проектпа пăхнă 68 метр виçене çитересси. Ку сĕнÿшĕн хальлĕхе 8 çын сасăлама кăмăл тунă.
Чăваш Ен Информаци политикипе
массăллă коммуникацисен министерстви.