09 ноября 2013 г.
Коллегире пăхса тухнă
Ĕнер Чăваш Республикин Экономика аталанăвĕн, промшленноç тата суту-илÿ министерствин коллегийĕн анлă ларăвĕ иртнĕ. Унта Муркаш районĕнче «пĕр чÿрече» мелĕпе çынсене патшалăх тата муниципалитет услугисемпе тивĕçтерессин ĕçне мĕнле йĕркелени пирки ыйту пăхса тухнă.
Муркашра граждансене услугăсемпе тивĕçтерекен нумай функциллĕ центр иртнĕ çулхи сентябрь уйăхĕнче уçăлнă. Çынсенчен документсем йышăнассине тата хатĕрлесе парассине «икĕ чÿрече» мелĕпе йĕркеленĕ. Центр 35 услугăпа тивĕçтерет. Ноябрĕн 1-мĕшĕ тĕлне 2151 çын нумай функциллĕ центрăн услугипе усă курма пултарнă.
Кунсăр пуçне услугăсемпе тивĕçтерекен центрăн «пĕр чÿрече» мелĕпе ĕçлекен филиалĕсене ялти 15 библиотекăра йĕркеленĕ. Хальхи вăхăтра библиотекăсенче муниципалитетăн 25 услугипе усă курма май пур.
Тĕп вырăнта - ĕç эффективлăхĕ
Районти культура учрежденийĕсен ертÿçисен канашлăвĕ иртнĕ. Унăн ĕçне район администрацийĕн пуçлăхĕ Ростислав Тимофеев хутшăннă. Канашлура культура учрежденийĕсен ĕçне эффективлăрах тăвассипе, контракт çине куçассипе, тивĕçтерекен услугăсен шутне тата пахалăхне ÿстерессипе çыхăннă тата ытти ыйтусене сÿтсе явнă. «Культура учрежденийĕсен ĕçĕ-хĕлĕн эффективлăхне, кунпа пĕрлех вĕсенче вăй хуракансен ответлăхне вĕçĕм ÿстерсе пырас пулать, бюджет укçи-тенкине шутлама пĕлмелле», - палăртнă хăйĕн сăмахĕнче Ростислав Николаевич.
Премие тивĕçнисем - иккĕн
«Вĕренÿ» наци проекчĕпе килĕшÿллĕн çуллен çĕр-шыври 14 - 25 çулсенчи вĕренÿре тата ĕçре маттур яшсемпе хĕрсене пулăшма Раççей Президенчĕн премийĕпе тивĕçтереççĕ. Чăваш Енре кун пек чыса тивĕçнисем кăçал 44-ăн. Вĕсенчен 8-шĕ 60 пин, 36-шĕ 30-шар пин тенкĕ илĕ.
Лауреатсем хушшинче Муркашсем те çук мар. Акă Екатерина Федорова - Юнкă шкулĕн воспитанникĕ, халĕ Чăваш патшалăх университетĕнче вĕренет. Катя республикăри 8-мĕш вăрман олимпиадин çĕнтерÿçи пулса тăнăччĕ.
Николай Данилов вара çамрăк техниксен станцийĕнче ăсталăх туптать. Вăл - шкул ачисем хушшинче спортпа техника тата прикладной спорт тĕсĕ енĕпе А.Г. Николаев космонавт ячĕллĕ кубока çĕнсе илессишĕн республикăра 2012 - 2013 вĕренÿ çулĕнче ирттернĕ 9-мĕш спартакиада çĕнтерÿçи.
Пултаруллă та мал ĕмĕтлĕ çамрăксене малашне те ăнăçусем сунатпăр.
Археологсемпе тĕл пулнă
Республикăри археологсем Чăваш Ен историне тĕпчес ĕçе тивĕçлĕ тÿпе хываççĕ. Тăтăшах вĕсем тĕрлĕ вырăнсене командировкăсене тухса çÿреççĕ, чавса шырав ĕçĕсем ирттереççĕ, халиччен пĕлменнине тупса палăртаççĕ.
Нумаях пулмасть Чăваш патшалăх гуманитари наукисен институчĕн археологĕсен ушкăнĕ Ильинка шкулĕнче пулнă, шкул музейĕнчи экспонатсемпе паллашнă, вĕренекенсемпе тĕл пулу ирттернĕ, археологи ĕçĕсем пирки интереслине чылай каласа панă.
Çитес çул çуркунне вара археологсем кунти тăрăха тĕпчес ĕçе шкул ачисене те явăçтарма шантарнă.
345 ача çуралнă
Районĕпе кăçалхи 10 уйăхра 345 ача çуралнă. Ку вăл иртнĕ çулхи çав вăхăтринчен 22 ача сахалрах. Çуралнисем хушшинче хĕр ачасем 174 тата арçын ачасем 171.
Çынсем вилесси сахалланнă. Пурнăçран уйрăлса каякансем иртнĕ çул çак вăхăта 492 çын пулнă пулсан, кăçал - 457. Вилекенсен вăтам ÿсĕмĕ арçынсен 61 çулпа, хĕрарăмсен 76 çулпа танлашать.
Çемье çавăракансем 159 мăшăр пулнă. Вĕсен вăтам ÿсĕмĕ 18 - 24 çул.
Йыш хушăнассипе Москакасси (иртнĕ çул 34 ача, кăçал 40 ача çуралнă), Оринин (23 тата 32 ача), Çатракасси (22 тата 29 ача), Юнкă (15 тата 17 ача) ял тăрăхĕсенче лару-тăру ытти çĕртинчен лайăхрах.
В. ШАПОШНИКОВ хатĕрленĕ.