09 ноября 2013 г.
Ĕнер пирĕн районти Шомик ялĕнче çĕнĕ фельдшерпа акушер пункчĕ хута кайрĕ. Ăна уçма ЧР сывлăх сыхлавĕпе социаллă аталану министрĕ Алла Самойлова килсе çитрĕ. Ялсенче çĕнĕ ФАП-сем уçни унта пурăнакансен сывлăхне çирĕплетме пулăшнине, сывлăхлă ачасем çураласси çине ырă витĕм кÿнине палăртса каларĕ вăл. Çакна май министр пирĕн районти икĕ амăшне - Муркашри Алина Тихоновăпа Ваçкассинчи Инна Егоровăна - виççĕмĕш ача çуралнă ятпа саламласа республикăн амăш (çемье) капиталĕн сертификатне парса чысларĕ.
Шомик тăнăç аталанакан ял. Çакна палăртса район администрацийĕн пуçлăхĕ Р. Тимофеев тата Чăваш Республикин Патшалăх Канашĕн депутачĕ Н. Ванеркин медицина пулăшăвне паракан çурт уçăлни питĕ вырăнлине каларĕç. Районти тĕп больницăн тĕп врачĕ В. Данилов вара кунта ĕçе кирлĕ пек йĕркелессине шантарчĕ.
Савăнăçлă саманта ял халăхĕ тахçантанпах кĕтнĕ, çавăнпах кунта ватти-вĕтти те чылаййăн пухăннă. Ялтах фельдшер ĕçлеме тытăнни ватăрах çынсемшĕн тата ачасемшĕн уйрăмах лайăххине палăртаççĕ вĕсем. Вырăнти ял тăрăхĕн пуçлăхĕ Г. Лебедев та çакна çирĕплетсе ФАП ку тăрăхри 600-е яхăн çынна пулăшу пама пуçласси пирки каларĕ.
Халăхшăн пĕлтерĕшлĕ ФАП уçăлни Чăваш Ен Пуçлăхĕн «О дополнительных мерах по совершенствованию оказания первичной медико-санитарной помощи сельскому населению в Чувашской Республике» Указне пурнăçа кĕртессипе çыхăннă. Халĕ Шомикра пурăнакансем те вырăнтах тивĕçлĕ медицина пулăшăвĕ илме пултараççĕ, фельдшерпа час-часах канашласа чир-чĕртен те сыхланма май ытларах пулĕ вĕсен.
Н. Николаева.