29 декабря 2012 г.
Çĕнĕ çул уявĕ хыççăн канмалли кунсем чылай. Пурте вăхăта уçă сывлăшра канса ирттерме тăрăшаççĕ. Анчах та асăрханулăх пирки манма юрамасть, унсăрăн больница койки çине кайса выртасси те инçе мар. Паянхи сĕнÿсем – Шупашкарти 1 " хула клиника больницинчи травмпунктăн аслă ординаторĕ Александр Бакановран:
– Çĕнĕ çул уявланă чухне ытларахăшĕ больницăна ÿксе мĕн те пулин ыраттарнипе, хуçнипе е ÿт тĕртĕмне туртăнтарнипе пырать. Çавăнпа та чи малтанах утса çÿреме хăтлă атă-пушмак пулмаллине асăрхаттарса хăварас килет. Унăн кĕлли те çÿллĕ пулмалла мар. Пушмак тĕпĕ пăр çинче те ан шутăр.
Выляма чăнкă сăртсем çине кайма ан тăрăшăр. Унта ярăнатăр пулсан тăрса ярăнмалла мар. Суран пулчĕ пулсан вара ыраттарнă вырăна сивĕ тытмалла, травмпункта каймалла.
Уяври фейерверксем те асăрханулăх тата тимлĕх ыйтаççĕ. Пиротехника хатĕрĕсене ятарлă лавккара туянма тăрăшăр. Вĕсемпе усă курнă чухне инструкци вуламасăр ан «ĕçлĕр». Фейерверк панă чух ăна сăнакансенчен аяккарах каймалла. Пиротехника изделийĕсемпе усă курнă чухне асăрханмасан ытларах чух алă, пит тата куç суранланать. Пиротехника изделийĕ сирпĕннипе пиçсе кайнă вырăна тÿрех 10–15 минутлăх сивĕ шыва е юр ăшне чикмелле. Хыççăн стерильнăй бинтпа çыхмалла, хăвăртрах васкавлă пулăшу чĕнмелле е больницăна леçмелле.
Урамра 10 градус сивĕ кăна пулсан та нумай вăхăт уçă сывлăшра пулни ÿте шăнтса яма пултарать. Сивĕ чухне эрех ан ĕçĕр. Çакна асăрхаттарсах калас килет. Мĕншĕн тесен эрех ĕçни организм ăшшине чакарать, çавăнпа та сире сивĕ мар пек туйăнать кăна.
Урама тухма ăшă тумтир суйлăр. Алсиш, çĕлĕк тата шарфсăр ан тухăр. Пÿрнесем шăннине сисрĕр пулсан тÿрех ăшă пÿлĕме кĕмелле.
Çак сĕнÿсене асра тытсан Çĕнĕ çул савăнăçлă иртмелле.