26 декабря 2012 г.
Раççей Федерацийĕн Шалти ĕçсен министерстви çумĕнче тата унăн вырăнти органĕсенче обществăлла канашсем йĕркелесси пирки калакан Указ 2011 çулхи май уйăхĕнче вăя кĕнĕччĕ. Унпа килĕшÿллĕн ĕнтĕ пирĕн республикăра та министерство çумĕнчи обществăлла канашпа пĕрлех районсенчи канашсем те ĕçе кÿлĕнчĕç.
Обществăлла канашăн ĕçĕ чылай тата тĕрлĕ енлĕ, анчах та ăна йĕркеленин тĕп тĕллевĕ полицейскисемпе халăх хушшинчи çыхăнăва тачăрах тăвасси пулса тăрать. Çыхăну вара çынсене полицейскисен ĕçĕ-хĕлĕпе паллаштарассинче кăна мар, йĕрке хуралçисен ĕçне халăх мĕнле хак панине пĕлсе тăрассинче те, çав хаклавпа пакунлисене паллаштарса тăрассинче те, шалти ĕçсен органĕсене пырса тивекен программăсем хатĕрлессине тата пăхса тухассине хутшăннинче те, йĕркене пăсассинчен асăрхаттарассинче тата ытти те. Обществăлла канаш умне лартнă задачăсемпе тĕллевсене шута илсе канаш членĕсем саккунпа пăхса хунă тĕрлĕ правопа (сăмахран, полици сотрудникĕсен ĕçĕ пирки информаци ыйтса илесси, вĕсен саккунлă интересĕсене хÿтĕлеме явăçни тата ытти те) усă курма пултараççĕ.
Канаш хăйĕн ĕçне обществăлла майпа туса пырать, çавăнпах ун йышĕнче активлă гражданла позициллĕ çынсем пулни пысăк пĕлтерĕшлĕ. Вĕсем çынсене те, полици сотрудникĕсене те яланах пулăшма хатĕр. Вĕсемпе паллаштарни те ытлашши пулмĕ – канаш членĕсем патне кашниех тĕрлĕ ыйтупа тухма пултарать.
Обществăлла канашăн председателĕ – Н. Ванеркин, ЧР Патшалăх Канашĕн депутачĕ; председатель çумĕ – Ю. Соловьев, шалти ĕçсен пайĕн ветерансен канашне ертсе пырать. Канаш йышĕнче пирĕн районти çак çынсем: «Агронефтепродукт» кооператив ертÿçи, депутатсен районти Пухăвĕн депутачĕ В. Кожанов; ДОСААФăн вырăнти ертÿçи, Муркашри вăтам шкулти вĕрентекен В. Львов; ачасемпе çамрăксен районти спорт шкулĕ – «Сывлăх» ФСК директорĕ А. Куликов; Е. Андреев ячĕпе хисепленекен хуçалăх ертÿçи В. Семенов; Муркаш райпо канашĕн ертÿçи Б. Андреев; Мăн Сĕнтĕрти райпо канашĕн ертÿçи Л. Майкова; Ф. Ягушов иерей; Муркашри вăтам шкул директорĕ Н. Смирнов; Афганистан вăрçин инваличĕсен Пĕтĕм Раççейри обществăлла организацинче тăракан К. Петров тата çак йĕркесене çыраканĕ.
Çак уйăхри ларура районти обществăлла канаш çитес çулхи утăмсене палăртрĕ. Ума лартнă задачăсем татах та анлăланчĕç: уйăхра пĕрре граждансене йышăнассине йĕркелемелле, çынсене право тĕлĕшĕнчен пулăшу памалла, обществăри мероприятисем е пулăмсем пирки хăйсен шухăш-кăмăлне массăллă информаци хатĕрĕсем урлă пĕлтермелле тата ытти те.
Н. Николаева.