28 сентября 2013 г.
Хутса ăшăтмалли тапхăр
Кĕрхи çанталăк сивĕрех те сивĕрех. Октябрь уйăхĕччен шутлă кунсем юлчĕç. Çак кунсенче район администрацийĕн пуçлăхĕ йышăну тунă. Унпа килĕшÿллĕн ĕнер-паян сывлăх сыхлавĕн учрежденийĕсене тата шкул çулне çитмен ача-пăча учрежденийĕсене, пĕтĕмĕшле пĕлÿ паракан шкулсене ăшă пама пуçăннă. Обществăлла тата пурăнмалли нумай хваттерлĕ çурт-йĕре тулти сывлăшăн талăкри вăтам температури 5 талăк хушши 8 градусран пĕчĕкрех тăрсан е октябрĕн 1-мĕшĕнчен тытăнса хутса ăшăтма пуçăнĕç.
Спорт сооруженийĕсем çĕнелĕç
Сентябрĕн 24-мĕшĕнче районта Чăваш Республикин физкультура, спорт тата туризм министрĕн çумĕ Сергей Шелтуков пулнă. Район администрацийĕн пуçлăхĕпе Ростислав Тимофеевпа тĕл пулнă май вĕсем ачасемпе çамрăксен Муркашри Валентина Егорова ячĕпе хисепленекен спорт шкулне малашлăхра аталантарса пырассин, Муркаш стадионĕнче юсав ĕçĕсем туса ирттерессин, Муркашри Спорт çуртне капиталлă юсассин ыйтăвĕсене сÿтсе явнă.
Чи лайăх воспитателе
палăртма
Районта октябрĕн 1-мĕшĕнчен тытăнса 31-мĕшĕччен «Çулталăкри чи лайăх обществăлла воспитатель» конкурс ирттерме пăхнă. Чи маттур ĕçчене конкурса тăратнă материалсен презентацине ирттерсе палăртĕç.
Конкурс йĕркелесси пирки сентябрĕн 25-мĕшĕнче район администрацийĕ çумĕнчи çул çитмен çамрăксен тата вĕсен прависене хÿтĕлекен комиссин черетлĕ ларăвĕнче йышăну тунă. Ларура çавăн пекех ачасем çулсем çинче инкексене лекессине асăрхаттарассипе, çемьесенче ачасене тивĕçлĕ воспитани парассишĕн ашшĕ-амăшĕн ответлăхне ÿстерессипе çыхăннă ыйтусене те сÿтсе явнă, административлă ĕçсем пăхса тухнă.
Юсав ĕçĕсем вĕçленеççĕ
Районта кăçал нумай хваттерлĕ çуртсенче туса ирттерме палăртнă капиталлă юсав ĕçĕсем вĕçленсе пыраççĕ. Пурнăçлакан ĕçсен пахалăхне район администрацийĕн пуçлăхĕн хушăвĕпе йĕркеленĕ ятарлă комисси тĕрĕслесех тăрать. Акă çак кунсенче Муркаш ялĕнчи Ленин урамĕнчи 28-мĕш тата Октябре 50 çул урамри 22-мĕш çуртсенче туса ирттернĕ капиталлă юсав ĕçĕсене, Юнкă ялĕнчи Центральная урамри 35-мĕш çуртăн çивиттене комисси йышăннă. Тупса палăртнă хăш-пĕр çитменлĕхсене подрядчиксем пĕр-икĕ кун хушшинче пĕтерме шантарнă. Çурт-йĕр хуçисем юсав ĕçĕсен пахалăхĕпе кăмăллă.
Муркашри Октябре 50 çул урамри 14-мĕш çуртăн çивиттине, фасадне тата путвалне, Юнкăри Центральная урамри 35-мĕш çуртăн никĕсне, шыв тата электроснабжени системисене юсас ĕçсем пыраççĕ. Çанталăк улшăнса тăнине пăхмасăрах строительсем палăртнă ĕçсене вăхăтра вĕçлес кăмăллă.
Ĕçе вырнаçма –
банкомата;
Перекет банкĕн банкомачĕсемпе тÿлев терминалĕсем урлă халĕ ĕç укçи илме е тĕрлĕ тÿлевсем, кредитсем, коммуналлă услугăсемшĕн тÿлеме кăна мар, ĕç вырăнĕсем пуррипе çукки пирки те пĕлме май пур. Вакансисен базине Интернет сетĕнче wwwĕchuvashĕregiontrudĕru ресурсра вырнаçтарнă. Унпа Интернетпа çыхăнтарнă кирек хăш компьютертан та, банкоматсемпе терминалсенчен те кĕме пулать. Пĕтĕм вакансисем «сирĕн алăра». Çĕр-шыв шайĕпех.
В. ШАПОШНИКОВ
хатĕрленĕ.