07 сентября 2013 г.
Ĕç тăвакан влаç тата вырăнти хăй тытăмлăх органĕсем иртнĕ çулхи июль уйăхĕнчен пуçласа халăха услугăсемпе тивĕçтерессинче ведомствăсем хушшинчи электрон çыхăнăвĕн системине (СМЭВ) вăя кĕртрĕç. Çакна патшалăх управленийĕн системин ĕç-хĕлне улăштарас, влаçăн ĕç тăвакан функцине оптимизацилес, çавна май патшалăх службипе çынсем хушшинчи хутшăнăва шайлаштарас, тухăçлăрах йĕркелес тĕлĕшпе пурнăçлаççĕ. Çапла вара çĕнĕ тытăм ку тĕлĕшри ĕçре уççăнлăх кĕртмелле, çынсен ыйтăвĕсене тĕпе илмелле.
Услугăпа усă курас текен çыншăн тĕрлĕ документ, справка пухасси йывăрлăх кÿмелле мар. Çапла вара органсем хушшинчи ĕçлĕ çыхăну пуриншĕн те меллĕ пулмалла.
Чăваш Енре ведомствăсем хушшинчи электрон хутшăнăвне ĕç тăвакан 15 влаç органĕ, 26 муниципалитет тата 291 ял тăрăхĕ хутшăнать. Çапла вара асăннă системăпа патшалăхăн 96 услугипе тивĕçтермелле.
Чăваш Республикин ĕçпе тивĕçтерекен органĕ ведомствăсем хушшинчи электрон çыхăнăвĕн системипе социаллă хÿтлĕх пайĕсемпе тата Раççейри Пенси фончĕн управленийĕсемпе республикăн районĕсемпе хулисенче усă курать. Кăçалхи январь – август уйăхĕсенче ведомствăсем хушшинчи 855 хуравне тата 129 ыйтăвне Пенси фончĕн управленийĕсене, çавăн пекех социаллă хÿтлĕх пайĕсене 96 хурав тăратнă.
Ку тĕлĕшри ĕç-хĕл çакăн пек. Социаллă хÿтлĕх пайĕн специалисчĕ çын ыйтăвне тишкернĕ май ăна электрон мелĕпе ĕçпе тивĕçтерекен центра ярать, унтан вара хăйне кирлĕ информацие илет. Çапла вара çыннăн вăхăчĕ тата укçи-тенки перекетленет, документ пухасси те палăрмаллах çăмăлланать. Раççей Федерацийĕн саккунĕсемпе килĕшÿллĕн информаци тăратас тапхăра шайлашăнма май парать. Çакна та палăртса хăвармалла. Çак мелпе усă курни информацие ыттисенчен хÿтĕлет, апла пулсан вăл тивĕçлĕ органсемшĕн кăна уçă. Çапла вара асăннă ведомствăсем хушшинчи электрон çыхăнăвĕн системипе (СМЭВ) усă курасси çултан-çул анлăланса пымалла.
Р. Илларионова.