27 июля 2013 г.
Чи лайăх 100 хуçалăх шутĕнче
Çулленех Чăваш Республикин унитарлă «Агро-Инновация» хысна учрежденийĕн специалисчĕсем агропромышленноç комплексĕн предприятийĕсен рейтингне ирттерсе республикăри чи лайăх 100 хуçалăха – «Агро-100» клуб членĕсене – палăртаççĕ. 2012 çул итогĕсемпе республикăра тăнăç та йĕркеллĕ аталанса пыракан хуçалăхсен шутне кĕме районти çак хуçалăхсем тивĕçнĕ:
– «Путь Ильича» агрофирма» ООО – 38-мĕш вырăн;
– Суворов яч. хис. СХПК – 56-мĕш вырăн;
– «Оринино» СПК – 73-мĕш вырăн;
– Ильич яч. хис. СХПК – 97-мĕш вырăн;
– Чкалов яч. хис. СХПК – 98-мĕш вырăн.
Вĕренÿ çулĕ пуçланас умĕн
Шкулсенче 2013 – 2014 вĕренÿ çулĕ пуçланиччен вăхăт нумаях юлмасть. Хатĕрленÿ ĕçĕсем вĕренÿ учрежденийĕсенчен ытларахăшĕнче вĕçленсе пыраççĕ.
Шкулсем çĕнĕ вĕренÿ çулне хатĕррине палăртма июлĕн 30-мĕшĕнчен тытăнса августăн 2-мĕшĕччен районти вĕренÿ учрежденийĕсен 45 объектĕнче тĕрĕслевсем ирттерме палăртнă. Çавна валли йышăну комиссийĕсем 2 йĕркеленĕ. Вĕсен шутĕнче район администрацийĕн вĕренÿ тата çамрăксен политикин пайĕн, районти пушар надзорĕн, Роспотребнадзор управленийĕн территори пайĕн, Ростехнадзорăн экологи тата технологи надзорĕн управленийĕн, районти шалти ĕçсен пайĕн представителĕсем.
Тăлăхсен çурт-йĕр
условийĕсене лайăхлатаççĕ
Тăлăх тата ашшĕ-амăшĕн хÿтлĕхĕсĕр тăрса юлнă ачасене патшалăх тимлĕхсĕр хăвармасть. Çакă чи малтанах вĕсене пурăнма кирлĕ йĕркеллĕ çурт-йĕрпе тивĕçтерессипе, юсав ĕçĕсем пурнăçласа парассипе çыхăннă.
Кăçалхи виççĕмĕш кварталта районта тăлăх тата ашшĕ-амăшĕсĕр тăрса юлнă ачасен харпăрлăхĕнчи пурăнмалли 3 çуртра юсав ĕçĕсем туса ирттерме палăртнă. Çуртсене пурăнма юрăхлă, законодательствăпа килĕшÿллĕн санитарипе техника нормисене тивĕçтерекен тăвассипе юсав ĕçĕсене «Моргаушавтотехсервис» ООО строителĕсем пурнăçлĕç.
Пуçарулăх ытларах пултăр
Вырăнти пурнăç мĕнле пуласси ытларах кунта пурăнакансенчен, вĕсен активлăхĕпе пуçарулăхĕнчен килет. Çапла шутлать Юнкă ял тăрăхĕн пуçлăхĕ Валерий Фомин. Вырăнти депутатсемпе ял старостисене кунта чи тивĕçлисене суйлама тăрăшаççĕ. Мĕншĕн тесен шăпах вĕсем тăраççĕ те ĕнтĕ ял тăрăхĕн администрацийĕпе вырăнта пурăнакансем хушшинчи çыхăну сыпăкĕнче. Çакăнта Василий Илугин, Алевтина Илугина, Николай Чернов, Валентина Краснова, Олег Аргандеев пирки чи ырă сăмахсем каламалла.
Учительсем, сире кĕтеççĕ
Çак вăхăта республикăри вĕренÿ учрежденийĕсенче 500 ытла ваканси пулсан, районта вакансисен хисепĕ 12. Шкулсенче ĕçлеме ытларах физика, математика, истори, биологи предмечĕсене вĕрентекенсем çитмеççĕ.
Ĕçе вырнаçма пулăшаççĕ
Профессипе техника училищисенчен вĕренсе тухакансене ĕç вырăнĕ тупма майсем туса парас тĕллевпе ĕçпе тивĕçтерекен патшалăх службин Чăваш Енри уйрăмĕн порталĕнче «Работодателям» пайра «Резюме выпускников» вырнаçтарнă. Унта професси пĕлĕвĕ илнĕ выпускниксен даннăйĕсен банкĕ пур. Кунти информаципе усă курса ĕç паракансем хăйсене кирлĕ специалистсене суйласа илме, вĕсемпе тÿрремĕн çыхăнма пултараççĕ. Информацие вĕçĕмех çĕнетсе тăраççĕ. Çакă ĕç паракансемшĕн те, вĕренсе тухнисемшĕн те меллĕ.
В. ШАПОШНИКОВ
хатĕрленĕ.