17 июля 2013 г.
Следстви комитечĕ 9 эпизодпа пуçарнă уголовлă ĕç тĕлĕшпе айăплав тăратнă.
Следстви çапла палăртать. Экономика преступленийĕсемпе кĕрешекен полици сотрудникĕ ют пурлăха хăй аллине çавăрса илме шухăш тытнă. 2009 – 2010 çулсенче Муркашри пурăнмалли çурт-йĕрте муниципалитет шайĕнчи икĕ пÿлĕме приватизаци туманнине пĕлнĕ. Çаксене вăл харпăрлăха куçарма, каярах вара сутма ĕмĕтленнĕ. Ĕçе кăлтăксăр ирттерес тесе район администрацине тата миграци службине суя информаци тăратнă, ултавлă ĕçсем тума хăйĕн икĕ пĕлĕшне хутшăнтарнă. Вĕсемпе «юлашки числопа» усă курса килĕшÿ тунă, укçа-тенкĕ тăкакламасăрах пÿлĕмлĕ пулнă. 2010 çулхи апрель тата 2011 çулхи январь уйăхĕсенче çав пÿлĕмсене 500 пин тата 800 пин тенкĕпе сутнă.
Преступлени тăвасси кунпа кăна вĕçленмен. Экономика преступленийĕсемпе «хытă кĕрешекенскер» ултавлă ĕç кал-кал пынине сисет. Халĕ вара вăл татах та пысăкрах тĕллев тытать. Муниципалитетăн виçĕ çĕр лаптăкĕ тата вунă объект, ку – ял хуçалăх предприятийĕн куçман пурлăхĕ.
Полици сотрудникĕ çурт-йĕрсемпе сооруженисене хăй аллине çавăрса илсе 4 миллион та 800 пин тенкĕлĕх тăкак кÿнĕ.
3 пин тăваткал метрлă муниципалитет çĕр лаптăкне ултавлă майпа 49 çуллăх арендăна илнĕ, унăн хакĕ 600 пин тенкĕ ытла. Çапла вара асăннă пурлăха приватизацилесе район харпăрлăхĕнчен кăларас хăрушлăх тухса тăнă.
110 пин тăваткал метр калăпăшлă 6 миллион та 900 пин тенкĕллĕ çĕр лаптăкĕ çинче вăл алла çавăрса илме палăртнă пурлăх виçи пысăк. Район администрацийĕ çакна вăхăтра асăрханă, ĕçе вĕçне çитерме паман. Следстви малалла пырать.
Пичете следстви комитечĕн материалĕ тăрăх хатĕрленĕ.