17 июля 2013 г.
Ильинка ял тăрăхĕн пуçлăхĕ Юрий Перцев хăйĕн тивĕçĕсене пурнăçлама пăрахни пирки хаçатра пĕлтернĕччĕ. Çавна май ял тăрăхĕн пуçлăхне çĕнĕрен суйлассипе асăннă ял тăрăхĕн территорийĕнче сентябрĕн 8-мĕшĕнче суйлав ирттермелле пулать. Çак ĕç мĕнле пыни пирки район администрацийĕн пуçлăхĕн çумĕ, йĕркелÿпе кадрсен, право енĕпе тивĕçтерессин тата вырăнти хăй тытăмлăх органĕсемпе ĕçлекен пай пуçлăхĕ, Муркаш территори суйлав комиссийĕн председателĕ Лилия Тарасова каласа парать:
– Ильинка ял тăрăхĕн пуçлăхне суйласси пирки депутатсен Ильинка ял тăрăхĕнчи Пухăвĕн йышăнăвĕ июнĕн 22-мĕшĕнче официаллă майпа пичетленсе тухрĕ. Çавăнтанпа суйлав кампанийĕ пуçланнă шутланать.
Ку округра пĕтĕмпе суйлавçăсен хисепĕ 1590 çын. Ял тăрăхĕн территорийĕнче 4 суйлав участокĕ йĕркеленĕ. Кусем вĕсем 534-мĕш Тренккă, 535-мĕш Апчар, 536-мĕш Вăрманкасси тата 537-мĕш Мăн Шашкар участокĕсем.
Ял тăрăхĕн пуçлăхне суйлама кандидатсене икĕ мелме тăратма пулать. Пĕрремĕшĕ – кандидатсем хăйсене хăйсем сĕнеççĕ, тепĕр мелĕ – партисем хăйсен кандидатурисене сĕнеççĕ. Кунта пĕр саманта асăрхаттарса хăварас пулать: кандидатсем ял тăрăхĕн пуçлăхне суйлама хăйсен кандидатурине хăйсем сĕнеççĕ пулсан вĕсен хăйсен кандидатуришĕн пулнине палăртса алă пуснисене пĕтĕм суйлавçăсен 0,5 процентĕнчен кая мар, кунпа пĕрлех 10-ран кая мар пухмалла.
Халĕ кандидатсем тăратас ĕç пырать. Паянхи куна территори суйлав комиссийĕ 3 кандидатран документсене йышăннă. Кандидатсенчен документсем йышăнасси июлĕн 29-мĕшĕнче 18 сехетре вĕçленет.
Кандидатсенчен хăйсен кандидатурисене иккĕн хăйсем сĕнчĕç. Пĕри – Эдуард Михайлович Васильев, 1980 çулта çуралнă, аслă пĕлÿ илнĕ, вăхăтлăх ниçта та ĕçлемест, Шупашкар хулинче пурăнать. Тепри – Владимир Михайлович Ляченков, 1968 çулта çуралнă, аслă пĕлÿ илнĕ, пенсионер, хамăр районти Макаçи ялĕнче пурăнать.
Виççĕмĕш кандидата Пĕтĕм Раççейри «Единая Россия» партин вырăнти организацийĕ сĕнчĕ. Вăл – Борис Юрьевич Леденцов, 1963 çулта çуралнă, ятарлă вăтам пĕлÿ илнĕ, Тренккăри информаципе культура центрĕ çумĕнчи Апчарти Культура çурчĕн заведующийĕнче ĕçлет, хамăр районти Апчар ялĕнче пурăнать.
Суйлав йĕрки паллă. Чи нумай сасă пухакан кандидат Ильинка ял тăрăхĕн пуçлăхне суйланнă шутланать. Суйлавçăсем пурте активлă пуласса шанса тăратпăр.
В. ШАПОШНИКОВ
калаçнă.