19 декабря 2012 г.
Обществăлла выльăх-чĕрлĕх патĕнче вăй хуракансемшĕн черетлĕ хĕл кунĕсем пыраççĕ. Ĕнер улăхра çÿренĕ выльăхсене витере тытса тăратас тапхăр кашнинченех тимлĕх, хатĕрленĕ апатпа перекетлĕ усă курма ответлăх ыйтать. Çакна ăнланса ĕçлесе пыракансен паян сăвăмĕ те ÿссех пырать. Ăна валли çаврăнăçуллисем çу кунĕсенче выльăх-чĕрлĕх апатне те çителĕклĕ янтăлама ĕлкĕрнĕ. Пахалăхĕ те тивĕçлĕ шайра.
Район администрацийĕн АПК аталанăвĕпе экономика управленине хуçалăхсенчен тăратнă оперативлă кăтартусене тишкерсен районта ĕнесем сăвас çĕрте те татса паман ыйтусем пурри куç умне тухать. Хуçалăхсенчи вăтам сăвăм тивĕçтерсех каймасть паян. Татах та тухăçлăрах ĕçлеме майсем пуррине пĕрешкел условисенчех ÿсĕмлĕрех тăрăшакан пĕрлешÿллĕ хуçалăхсен кăтартăвĕсем çирĕплетеççĕ. Апла пулсан сăвăм ÿсĕмĕн çулĕнче ыттисем ĕçсене ответлăха туйсах пурнăçласа çитереймеççĕ пулас.
Пĕтĕмĕшле илсен районти пĕрлешÿллĕ хуçалăхсем хĕл каçма тăратнă кашни ĕнерен иртнĕ эрне вĕçленнĕ тĕле талăксерен 8,5 килограмм сĕт сунă. Ку вăл иртнĕ çулхи çак вăхăтринчен 1,6 килограмм сахалрах. Сăвăма уйрăмах нумай чакарнисем – «Ударник» тата «Свобода» хуçалăхсем (5,5 тата 3,9 килограмм). Çав вăхăтрах Е. Андреев яч. хис. хуçалăх сăвăма 6,3 килограмм, «Путь Ильича» агрофирма 4,6 килограмм, «Восток» кооператив 3,8 килограмм, Суворов яч. хис. хуçалăх 3 килограмм ÿстернĕ.
Ĕне пуçне чи нумай сĕт сăваканнисем – Суворов яч. хис. хуçалăх дояркисем. Вĕсен кăтартăвĕ – 17 килограмм.
Районти ял хуçалăх производство кооперативĕсем паян талăксерен пĕтĕмпе 17074 килограмм сĕт сăваççĕ. Ку вăл иртнĕ çулхинчен 4774 килограмм сахалрах.
Хамăр инф.