15 декабря 2012 г.
Нумаях пулмасть Москакассинчи информаципе культура центрĕ çумĕнче «Шураппа» фольклор ушкăнĕ йĕркеленчĕ.
Çак пултарулăх ушкăнне йĕркелес тесе 1970-мĕш çулсенче «Шуçăм» ушкăна ертсе пынă Софья Ершова тата Москакасси ял тăрăхĕнчи вăрçăпа ĕç ветеранĕсен канашĕн ертÿçи Вера Беспалова чылай тăрăшрĕç. «Шураппа» ушкăн эрнере икĕ хут информаципе культура центрне пуçтарăнать. Кĕвĕ-çемĕ енчен вара ЧР культура тава тивĕçлĕ ĕçченĕ Надежда Кондукторова ертсе пырать.
Мĕнле юрăсемпе савăнтарать-ха ял халăхне çак ушкăн; Вĕсем ĕлĕкхи юрăсене тĕрлĕ çĕртен пуçтарчĕç. Чăннипех те юррисене итлеме питĕ кăмăллă. Çак ушкăна 80 çул урлă каçнă Елена Пушкина та çÿрени пурне те хавхалантарать. Вăл юрлакан ĕлĕкхи юрăсемпе ушкăна çÿрекенсем пурте кăсăкланаççĕ, вĕренсе юлма тăрăшаççĕ.
Кĕске хушăрах ушкăн Москакасси тата Рыккакасси клубĕсенче хăйĕн концерт программипе савăнтарчĕ. Хушăран ташă çаврăмĕсене те кăтартрĕç ăстасем. Ял çыннисем вара вĕсене тăвăллăн алă çупса хавхалантарчĕç.
Рыккакасси ялĕнче пурăнакан Вера Пайкова пултарулăх ушкăнне тав сăмахĕ каланă май чăтаймасăр хăйсен ялĕ çинчен хывнă юрра шăрантарса пачĕ. Унпа пĕрле ăна пурте юрларĕç. Ку ялта эпир ку таранччен илтмен юрăсемпе те паллашса килтĕмĕр.
Концертсем умĕн библиотека ертÿçи Любовь Ванюшкина кĕнекесен выставкине йĕркелерĕ, çĕнĕ кĕнекесемпе паллаштарчĕ. Рыккакасси ялĕнче пурăнакансене уйăхсерен кĕнекесемпе тивĕçтерме калаçса татăлчĕ вăл.
Г. ГОЛУБЕВА,
ЧР культура тава тивĕçлĕ ĕçченĕ.