15 декабря 2012 г.
Раштава кĕнĕ май телевидени передачисенче те ял-хуласенче Çĕнĕ çула хатĕрленни пирки хыпарсем ытларах та ытларах курăнаççĕ. Кашни кун иртмессерен урамсемпе çуртсем таврашĕнче электричестово гирляндисем йышланнăран пурте сисетпĕр, Çĕнĕ çул çывăхрах та çывăхрах. Кунпа пĕрлех хамăр сисмесĕрех кашниех унран асамлăх кĕтсе ăна анлă уявлама хатĕрленетпĕр. Çĕнĕ çул вăл – политикăн нихăш енне те пырса тивмен уяв. Çавăнпах ăна пурте пĕр йышра уявласси халăхăн йăлинче çирĕп никĕсленнĕ. Çак уява туллин кĕтсе илесси те халăхра пысăк пĕлтерĕшлĕ. Çак самант ытларах асра юлтăр тесе ĕç коллективĕсенче уява паллă тума тăтăшах çĕнĕлĕхсем кĕртеççĕ, елкăна электричествăн илемлĕ çутипе, тĕрлĕ çуртасемпе капăрлатаççĕ, савăнăç хăтне анлăлатма пиротехника изделийĕсемпе ытлă-çитлех усă кураççĕ. Халĕ каланине шута илсе шăпах çак тапхăр пушар тухаслăх тĕлĕшпе пысăк хăрушлăх кăларса тăратать те. Çакна эпир тăвакан çулленхи тишкерÿсем те çирĕплетеççĕ. Пĕтĕмлетсе калатăп, уявсенчи пушарсенче шăпах илĕртÿллĕ пиротехника изделийĕсем малти вырăна тухаççĕ.
Пытарма кирлĕ мар, паянхи рынок пиротехника изделийĕсенчен питĕ пуян. Вĕсем хушшинче иккĕленÿллĕ производство продукчĕсем те çук мар. Çавăнпа та хамăр енчен ку вăхăтра çирĕп тĕрĕслевсем йĕркелетпĕр. Шăпах иккĕленÿллĕ пиротехника изделийĕсене туянакан уяври савăнăç кĕрекине хăрушлăх илсе çитерет те. Кунпа пĕрлех пиротехника хатĕрĕсене ачасене шанса пани те инкеке анлă çул уçни тесе калас килет. Пиротехника хатĕрĕсен хăрушлăх факторĕсем: вĕсен куçăмĕн кинетика энергийĕ, сирпĕнес вăйĕ тата ванчăксем инçете сапаланас туртăмĕ т. ыт. те.
Тавар туянаканăн малтанах çакна пĕлмелле. Пиротехника хатĕрĕсене ваккăн сутма суту-илÿ залĕллĕ магазинсемпе павильонсенче кăна ирĕк пур е куçарса çÿремелли ятарлă киосксенче.
Асăннă препаратсемпе сутă тăвакансене паян çакна асăрхаттаратăп: сутăва кăларакан пиротехника хатĕрĕсене упрама ятарлă пÿлĕмсем кирлĕ. Вĕсемпе усă курассине тата унта мĕн чухлĕ пиротехника хатĕрĕ упрасси пирки вырăнти патшалăх пушар надзорĕн органĕсемпе килĕшсе татăлмалла. Юрăхсăра тухнă пиротехника хатĕрĕсен уйрăм вырăнта упранмалла.
Кашни пиротехника изделийĕпе пĕрлех (ваккисене валли – кашни упаковкăрах) унпа епле усă курмаллине вырăсла çырса ăнлантарнă инструкци пулмалла. Вĕсемпе сутă тунă вырăнсенче çак хатĕрсене ĕçлеттерсе тĕрĕслесси практикăра пулмалла мар.
Кĕскен каласан, Çĕнĕ çул фейерверкĕ савăнăç çеç илсе килтĕр тесен пасарсенче е ют çынран иккĕленÿллĕ пиротехника хатĕрĕсем тархасшăн ан туянăр. Туяннисемпе усă курма пуçличчен вĕсен инструкцийĕсемпе тĕплĕн паллашăр.
Çывхаракан Çĕнĕ çул кашни киле савăнăç çеç илсе килтĕр!
А. ИЗОНОВ,
патшалăх пушар
надзорĕн районти
уйрăмĕн ертÿçи.