06 июля 2013 г.
Симĕс ĕç çи анлă сарăлнипе пĕрлех уй-хирсем саралма пуçлани черетлĕ вырма алăкран шакканине пĕлтерет. Мĕнле шухăш-ĕмĕт канăç памасть паян çĕр ĕçченне? Çак ыйту çине хурав тупма район администрацийĕн пуçлăхĕн тивĕçĕсене пурнăçлакан В. АНАНЬЕВПА çыхăнтăмăр.
– Пĕрлешÿллĕ хуçалăхсем уяр кунсемпе тулăхрах усă курса паян, тĕпрен илсен, паха утă ытлă-çитлĕ янтăлассипе ĕçлеççĕ. 3371 гектар çинче çулнă нумай çул ÿсекен курăксенчен пĕрлешÿллĕ хуçалăхсен ĕçченĕсем утă уйăхĕн 5-мĕшĕ тĕлне обществăлла выльăх-чĕрлĕх валли пĕтĕмпе 3725 тонна (69 процент) паха утă янтăлама ĕлкĕрчĕç. Утă хатĕрлес плана Чкалов яч. хис., Е. Андреев яч. хис. хуçалăхсем ирттерсе те пурнăçларĕç. Ку ĕçсем Суворов яч. хис., «Свобода», «Ударник» хуçалăхсемпе «Путь Ильича» агрофирмăра та кал-кал пыраççĕ. Вĕсем утă хатĕрлессипе ума лартнă тĕллевсене 73 – 57 процент пурнăçланă.
Утă янтăланипе пĕрлех малашлăха пăхакансем ĕç вăйĕсене сенаж хывса хăварас çĕре те хутшăнтараççĕ. Ку ĕçе те кая хăварас марччĕ. Хальлĕхе сенаж хывма виçĕ пĕрлешÿллĕ хуçалăхра массăллăн кÿлĕннĕ: «Ударник» 1500 тонна хатĕрленĕ (111 процент), «Герой» 800 тонна (123 процент) тата «Восток» 108 тонна (36 процент) хывса хăварнă.
Ыранхи куна пăхса ĕçлекен хуçалăхсен кĕр кунĕсем çитиччен пĕтĕмпе 5430 тонна паха утă, 11950 тонна сенаж тата 25600 тонна силос янтăлама ĕлкĕрмелле. Паянхи ĕçсен хăвăртлăхĕ пирĕн хуçалăхсем палăртнă карта ларасси иккĕлентермест, анчах ăна валли çĕр ĕçченĕн иртен пуçласа каç сĕмĕччен çанă тавăрса ĕçлемелле.
Умри ĕçсене çителĕклĕ те паха тума пултарсан çеç эпир патшалăх пулăшăвĕпе туллин усă курма пултаратпăр. Сăмах май кăçалхи 5 уйăхра районти агропромышленность комплексĕн предприятийĕсем федераци тата республика бюджечĕсенчен пĕтĕмпе 43242759,35 тенкĕ пулăшу илме хевте çитерчĕç. Тăрăшуллă ĕçлесен, ума лартнă тĕллевсене вăхăтра пурнăçласан çак сумма татах та ÿсме пултарать.
Паян симĕс ĕç çире тăрăшнипех вырмана тухассипе те хатĕрленÿ ĕçĕсене пуçăнма вăхăт. Паянхи лару-тăрупа çитес вырмара уй-хире пĕтĕмпе 63 «хир карапĕ» тухмалла. Вĕсене чăнах ĕçе кăларас тесен юсав ĕçĕсене паянах кÿлĕнмелле, комбайнсене механизаторсемпе комплектламалла. Ĕç килĕшĕвĕсем туса хире тухса кайиччен хăрушсăрлăх мероприятийĕсем ирттермелле. Вырмара «хĕрлĕ автана» çул парассинчен асăрхану ĕçĕсем, вĕрентÿсем ирттермелле. Йĕтемсемпе ампарсене çĕнĕ тырă йышăнма хатĕрлемелле. Çаксене вăхăтра пурнăçласан çеç вырма пирĕн патăмăра «ăнсăртран» килсе çитмĕ.
А. БЕЛОВ
калаçнă.