19 июня 2013 г.
Чăваш Ен Пуçлăхĕ Михаил Игнатьев июнĕн 17-мĕшĕнче Республика кунне хатĕрленсе ирттерессипе ĕçлекен йĕркелÿ комитечĕн ларăвне ирттернĕ. Патшалăх уявĕпе çыхăннă мероприятисем йышлă. Çавăнпа та вĕсене пурне те тивĕçлĕ шайра ирттерме кирлине палăртнă Михаил Васильевич.
Халăх пултарулăхĕн Пĕтĕм Раççейри «Раççей çăл куçĕсем» XXI фестивальне Раççей Федерацийĕнчи 27 регионтан 29 коллектив тата Белоруссирен тепĕр коллектив – пĕтĕмпе 700 çынна яхăн хутшăнĕ.
Пуçласа кăçал «Театрсен каçĕ» иртет. Республикăри пур театрсем те хăйсен спектаклĕсемпе представленийĕсене кăтартаççĕ.
Декораципе прикладной искусство маçтăрĕсен Пĕтĕм Раççейри «Руç маçтăрĕсем» XI конкурсĕ иртет. Унта Раççей Федерацийĕнчи 16 субъектран 30 маçтăр тата Чăваш Енри 30 маçтăр хутшăнма кăмăл тунă. Пултарулăх ĕçĕсене 10 номинацире хаклĕç.
Пĕтĕм чăвашсен «Акатуйне» халăх пултарулăхĕн коллективĕсем Раççейăн 16 субъектĕнчен тата Белоруссирен пĕтĕмĕшле 300 çын, Чăваш Ен хулисемпе районĕсенчен 53 коллектив пĕтĕмпе 700 çын хутшăнмалла.
Регионсем хушшинчи «Регионсем – килĕштерсе ĕçлессин чикки çук» XX выставкăна хутшăнакансем 195-ĕн – Чăваш Республикинчи 172 компани тата Раççей хулисенчи компанисем 23. Çавăн пекех Италипе Япони компанийĕсем те хутшăнма тивĕç. Выставкăна Тавралăха хÿтĕлемелли çулталăка халаллаççĕ. Сывă пурнăç йĕркине пропагандăлакан ятарлă площадкăсем йĕркелессине пăхса хунă.
Шупашкарти «Раççей регионĕсем – тăнăçлăхран аталану патне» VI экономика форумне республика тулашĕнчен 200 ытла участник, вăл шутра Раççей Федерацийĕн 27 регионĕн тата 7 ют çĕр-шыв представителĕсем (Белорусси, Великобритани, Израиль, Инди, Тунис, Украина, Чехи) хутшăнĕç.
Июнĕн 23 – 24-мĕшĕсенче Шупашкар хулинче фейерверксен Пĕтĕм Тĕнчери VI фестивалĕ иртет. Фестивале 5 команда хутшăнать.
Республика кунĕ умĕн тĕрлĕ строительство объекчĕсем хута яма палăртнă. Кусем вĕсем пурăнмалли çурт-йĕр, строительство керамикин завочĕ, тĕп шкул, модульлĕ фельдшерпа акушер пункчĕсем, газ участокĕн сервис центрĕ т. ыт. те.
Республика кунĕпе çыхăннă пысăк пĕл-терĕшлĕ мероприятисене Муркашсем те хутшăнаççĕ. «Контур» заводра «Регионсем – килĕштерсе ĕçлессин чикки çук» выставкăра район ĕçĕ-хĕлĕпе, ÿсĕмĕсемпе презентацире, стендсенче, панносенче, слайдсенче, сăн ÿкерчĕксен выставкинче паллашма май пулĕ. «Раççей регионĕсем – тăнăçлăхран аталану патне» экономика форумĕн шайĕнче район представителĕсем тĕрлĕ ыйтусемпе ирттерекен конференцисене, семинарсене, «çавра сĕтелсене», выставкăсене, презентацисене, ĕçлĕ тĕл пулусене, консультацисене, мастер-классене, бизнес-семинарсене, тренингсене хутшăнĕç. Пĕтĕм чăвашсен Акатуй уявĕнче районти пултарулăх коллективĕсем хăйсен юрри-ташшипе савăнтарĕç.