22 июня 2013 г.
Выльăх апачĕ хушăнать
Оперативлă кăтартусене пăхсан, ĕнерхи кун тĕлне районти çĕр ĕçченĕ утă хатĕрлессипе палăртнă плана 17 процент (950 тонна) пурнăçланă.
Кăçал кĕске хушăрах Чкалов яч. хис. хуçалăх (200 тонна – 100 процент), «Путь Ильича» агрофирма (510 тонна – 48 процент), Е. Андреев яч. хис. хуçалăзх (100 тонна – 40 процент) утă янтăлама пултарнă.
Обществăлла выльăх-чĕрлĕхе хĕл каçарма выльăх апачĕ янтăлассипе хĕрÿ кунсем пыраççĕ. Çĕр ĕçченĕ çак ĕçе çанă тавăрса кÿлĕннĕрен хатĕрленĕ апат кăтартăвĕ те кунсеренех ÿссе пырать. Иртнĕ кунсенче «Ударник» хуçалăх сенаж янтăлама пуçланă. Тăрăшуллă ĕçпе 200 тонна паха апат янтăланă та ĕнтĕ.
«Пĕр чÿрече» мелĕпе
Район администрацийĕн ĕçченĕсем тата патшалăхпа муниципалитет услугисемпе тивĕçтерекен нумай функциллĕ центр ĕçченĕсем Мари Республикинчи Йошкар-Ола хулинче иртнĕ регионсем хушшинчи пысăк конференцие хутшăннă. Ăна Мари Республикин Правительствипе «Раççей почти» ФГУП çынсене патшалăх тата муниципалитет услугисемпе «пĕр чÿрече» мелĕпе тивĕçтерес ыйтупа йĕркеленĕ. Унта хутшăнакансем республикăра патшалăх тата муниципалитет услугисемпе тивĕçтерессине «Раççей почтин» çыхăну уйрăмĕсенче епле йĕркеленипе интересленсе паллашнă.
Аса илтеретпĕр. «Пĕр чÿрече» мелĕпе çынсене пулăшу ĕçĕсемпе тивĕçтересси пирĕн районта та сарăлса пырать. Июлĕн 1-мĕшĕ тĕлне Шетмĕпуçĕнчи, Йÿçкассинчи, Катькасри, Мăн Сĕнтĕрти, Ильинкăри, Турайри, Юнкăри, Çатракассинчи, Чуманкассинчи тĕслĕх библиотекăсенче кун пек центрсем ĕçлеме пуçăнмалла. Çулталăк вĕçленнĕ тĕле «пĕр чÿрече» мелĕпе пулăшу ĕçĕсемпе тивĕçтерекен центрсем татах 6 библиотекăра уçăлмалла.
Ăсататпăр салтака
Июнĕн 18-мĕшĕнче районти яш-кĕрĕмĕн черетлĕ тепĕр ушкăнне Раççей Хĕçпăшаллă Вăйĕсен чаçĕсене службăна кайма республикăри пухăну пунктне Канаш хулине ăсатнă. Вĕсем Тĕп çар округĕнче Самара тата Оренбург облаçĕсенче хăйсен çар тивĕçне пурнăçлĕç. Кунта кайма чи маттур йĕкĕтсене суйласа илнĕ. Кусем вĕсем «В» тата «С» категорисемлĕ водительсем, аслă пĕлÿ илнисем, спортсменсем, сывлăх енĕпе çирĕпписем.
Пĕрлехи портал урлă
Патшалăх тата муниципалитет услугисен пĕрлехи порталĕпе усă курса паракан пулăшу ĕçĕсен тĕсĕсем ÿссех пыраççĕ. ЗАГС пайĕн услугисемпе усă курас пулсан та халĕ пур чухне те унта кайма кирлех мар. Акă çак вăхăта ача çуралнине, мăшăрсем пĕрлешнине, пĕр-пĕринчен уйрăлнине, çын вилнине регистрацилес пулсан та заявленисене электрон мелĕпе ярса пама пулать. Çавна валли кирек камăн та патшалăх тата муниципалитет услугисен пĕрлехи порталĕнче регистрациленсе «Личный кабинет» тумалла çеç.
Кирлĕ информаципе Чăваш Ен юстици министерствин сайтĕнче (gosuslugiĕru) е Муркаш район администрацийĕн сайтĕнче ЗАГС пайĕн баннерĕнче паллашма пулать.
Ырă пуçару
Катькас ял тăрăхĕнчи Кĕрекаçра ачасен кĕтнĕ савăнăç çитнĕ: ялти клубпа юнашар халĕ кунта ача-пăча валли вылямалли вырăн та пур. Кунта вырнаçтарнă хатĕрсене çак ялта çуралса ÿснĕ, халĕ «Завод игрового оборудования» акционерсен хупă пĕрлешĕвĕн генеральнăй директорĕ Григорий Васильев парнеленĕ. Кану вырăнне йĕркелеме пулăшнисене ял тăрăхĕн пуçлăхĕ Тав çырăвĕсем парса хавхалантарнă.
Ачасен кану вырăнне пухăннисене Катькасри ИКЦ çумĕнчи «Çăлкуç» фольклор ушкăнĕ тата Калайкассинчи «Ентеш» пултарулăх коллективĕ савăнтарнă.
В. ШАПОШНИКОВ, Н. Николаева,
А. Белов хатĕрленĕ.