22 июня 2013 г.
Республика кунĕн виçинче иртекен мероприятисем шутĕнче «Раççей регионĕсем – тăнăçлăхран аталану патне» 6-мĕш экономика форумĕ тата регионсем хушшинчи «Регионсем – чикĕсĕр ĕçтешлĕх» курав тĕп вырăн йышăнаççĕ. Вĕсем июнĕн 20-мĕшĕнче уçăлчĕç. Асăннă мероприятисене Муркаш районĕн ĕçлĕ делегацийĕ те хутшăнчĕ. Ăна район администрацийĕн пуçлăхĕ Ростислав Тимофеев ертсе пычĕ.
– Çулсеренех иртекен куравсем, форумсем уйрăмах пĕчĕк тата вăтам предпринимательлĕх субъекчĕсемшĕн пысăк пĕлтерĕшлĕ. Вĕсем хăйсен ĕçĕ-хĕлĕпе ыттисене паллаштарма, килĕшÿсем тума пултараççĕ. Раççей Пĕтĕм тĕнчери суту-илÿ организацине кĕнĕ май пирĕн ытларах тата çаврăнăçуллăрах тимлеме тивет. Паянхи кун пысăк конкуренцие çĕнтерме пултаракан продукци хатĕрлемелле, – терĕ Чăваш Республикин Пуçлăхĕ Михаил Игнатьев кунта пухăннисене саламласа тата пурнăç уттипе тан пыма чĕнсе.
Курава уçнă май М. Игнатьев экспозицисемпе паллашрĕ. Кунта хутшăнакансем пĕтĕмпе 195-ĕн – Чăваш Республикинчен 172 компани тата Раççей регионĕнчи 23 компани. Курава Тавралăха хÿтĕлемелли çулталăка тата экологие халалланă.
Асăннă куравра Муркаш районĕн ĕçлĕ сăн-сăпачĕ тивĕçлĕ шайра пулчĕ. «Сеспель» – республикăри машинăсем тăвакан пысăк предприятисенчен пĕри. Кунта цистернăсен 100 ытла модельне ăсталаса кăлараççĕ. Производствăра тĕнче стандарчĕсене тивĕçтерекен оборудованипе усă кураççĕ. Хатĕр продукципе курава хутшăнакансем кăсăкланни аван сисĕнчĕ.
Муркашри кирпĕч завочĕн партнерĕсем юлашки çулсенче йышлансах пыраççĕ. Хатĕр продукципе республика тулашĕнче те анлăн усă кураççĕ. Çавна май пĕтĕмĕшле тупăш илесси те палăрмаллах ÿсрĕ. Предприяти курав вăхăтĕнче килĕшÿсем тума та ĕлкĕрчĕ ĕнтĕ.
Çавăн пекех Муркашри чăх-чĕп фабрикин, «Сежина» тата «Федоровстрой» чикĕллĕ яваплăхлă обществăсен экспозицийĕсем кураканшăн кăсăклă пулчĕç.
Курав июнĕн 23-мĕшĕччен ĕçлет, Муркаш районĕн тата ытти экспозицисене çитсе курма васкăр.
Р. Илларионова.