26 июня 2013 г.
Çынсем район администрацине тĕрлĕ ыйтусемпе сахал мар пыраççĕ, çырусемпе тухаççĕ. Вĕсен ыйтăвĕсене вăхăтра тивĕçтересси тĕп тимлĕхре пулма тивĕç. Район администрацийĕн ĕçĕсен управляющийĕ Александр КРАСНОВ райадминистраци граждансен çырăвĕсемпе ĕçлесси мĕнле пулса пыни пирки каласа парать:
– Кăçалхи иккĕмĕш кварталта район администрацине граждансенчен 51 çыру килнĕ. Ку вăл иртнĕ çулхи çав вăхăтринчен 6 çыру сахалрах. Юлашки вăхăтра район администрацине килекен çырусен хисепĕ чакса пыни сисĕнет. 2011 çулта вĕсем 257, 2012 çулта 223 пулнă. Çакă вăл район администрацийĕнче патшалăх тата муниципалитет услугисемпе тивĕçтерекен нумай функциллĕ центр ĕçлеме тытăннипе те çыхăннă.
Асăннă центра уçни федераци, регион тата муниципалитет шайĕнчи ведомствăсемпе çыхăнса ĕçлеме май парать. 2010 çулхи июлĕн 27-мĕшĕнче «Патшалăх тата муниципалитет услугисемпе тивĕçтерессине йĕркелесси çинчен» Федераци саккунне йышăннăччĕ. Унта услугăсемпе тивĕçтерессине ансатлатассипе пурнăçламалли ĕçсене пăхса хунă. Патшалăх услугисен пĕрлехи порталне туса хунă. Вăл аталанса пырать. Нумай функциллĕ центр «пĕр чÿрече» мелĕпе патшалăх тата муниципалитет услугисемпе тивĕçтерессине йĕркеленĕ. Ведомствăсем хушшинче даннăйсемпе электронлă майпа хутшăнассипе усă куратпăр.
Муркаш районĕн нумай функциллĕ центрне 2012 çулхи сентябрьте йĕркеленĕ. Хальхи вăхăтра кунта пулăшу ĕçĕсемпе «икĕ чÿрече» мелĕпе тивĕçтереççĕ. Çулталăк вĕçленнĕ тĕле «пилĕк чÿрече» мелĕпе ĕçлеме тытăнмалла. Малашлăхра районта пурăнакан çынсен тĕрлĕ ыйтусемпе вырăнти хăй тытăмлăх органĕсене, Пенси фондне, миграци службине, социаллă хÿтлĕх пайне, регистраципе кадастр палатине те каймалла мар пулĕ. Ку ыйтусемпе çынсене нумай функциллĕ центр тивĕçтерĕ. Хальхи вăхăтра кунта 29 услугăпа тивĕçтереççĕ.
Районта пурăнакансен ыйтăвĕсене туллинрех тивĕçтерес тĕлĕшпе пĕрлехи информаци кунĕсем, ял çыннисемпе ятарлă тĕл пулусем йĕркелени те пысăк пĕлтерĕшлĕ. Уйăхсерен выльăх-чĕрлĕх пăхакансен пĕрлехи кунĕсене йĕркелессине те пăхса хунă. Çирĕплетнĕ графикпа килĕшÿллĕн район администрацийĕн ответлă ĕçченĕсем ял хуçалăх предприятийĕсенчи выльăх-чĕрлĕх комплексĕсене, ĕç коллективĕсене тухса çÿреççĕ, çынсен ыйтăвĕсене вырăнтах татса пама тăрăшаççĕ. Тарăн тишкермелли ыйтусене вара шута илсе авторĕсене çырупа хурав параççĕ.
Юлашки вăхăтра çурт-йĕр ыйтăвĕпе çыхăннă ыйтусем ытларах. Тăван çĕр-шывăн Аслă вăрçин участникĕсем, вăрçăра вилнĕ салтаксен тăлăх арăмĕсем çурт-йĕр илессипе е юсассипе килеççĕ. Кунсăр пуçне çурт-йĕр условийĕсене лайăхлатассипе çамрăк çемьесенчен те заявленисем пур. Çавăнпа пĕрлех çулсем тăвассипе, юсассипе те ыйтусемпе килекенсем пур. Вырăнти çулсене юсасси е тăвасси ял тăрăхĕсен шучĕпе пулмалла пирки ял тăрăхĕсен пуçлăхĕсемпе тачă çыхăнса ĕçлесе пыма тивет.
Граждансем хăйсен çырăвĕсенче хускатакан ыйтусене кура вĕсене пăхса тухма тата тивĕçлĕ хурав пама район администрацийĕн структура подразделенийĕсене ярса панă, пурне те шута илнĕ.
Çурт-йĕр ыйтăвĕпе çыхăннă заявленисем ытларах терĕмĕр. Кун пеккисем отчетлă тапхăрта 17 пулчĕç. Строительство комплексĕ енĕпе – 10, социаллă пулăшупа тивĕçтерессипе 4 заявлени пулнă. Транспортпа çыхăннă ыйтусене 3 йышăннă.
Администраци ячĕпе Кашмаш тата Хуракасси выççăлкки ялĕсенче пурăнакансенчен Кашмаш шкулне тăвасси пирки коллективлă çыру килнĕччĕ. Вĕсене тулли хурав панă.
Коммуналлă тата йăла ыйтăвĕсемпе çыхăннă ыйтусем шутĕнче электроэнергипе, ăшăпа тата газпа, шывпа тивĕçтерессине палăртмалла. Ку ыйтусене саккунпа килĕшÿллĕн вырăнти хăй тытăмлăх органĕсен шайĕнче татса пама тивĕç. Çавăнпа та ял тăрăхĕсен пуçлăхĕсемпе тачă çыхăнса ĕçлеме тивет.
Граждансенчен çырусем хăш ял тăрăхĕсенчен ытларах килеççĕ-ха; Кун пек заявленисем Муркаш, Çатракасси тата Юнкă ял тăрăхĕсенчен 6-шар пулчĕç. Ярославка ял тăрăхĕнчен – 5 заявлени, Турайпа Мăн Сĕнтĕр ял тăрăхĕсенчен – 4-шар.
Апрель – июнь уйăхĕсенче 17 заявление çÿлти организацисенчен ярса панă, 15 заявлени – коллективпа çырнисем.
Граждансен çырăвĕсенчен пĕри те асăрхамасăр юлмасть. Заявленисене пăхса тухнă май вĕсенчен 14 процентне тивĕçтернĕ,76 процентĕнче çыру авторĕсене тивĕçлĕ хурав панă. Заявленисен 10 процентĕнче хускатнă ыйтусене пăхса тухассине каярахри вăхăта пăхса хунă. Район администрацийĕн пуçлăхĕ патĕнче кăçалхи иккĕмĕш кварталта 53 çын йышăнура пулнă.
Граждансенчен килнĕ кашни çырурах – çын шăпи, кулленхи пурнăçпа çыхăннă ыйтусем. Вĕсенчен пĕрне те асăрхамасăр юлмалла мар тесе шухăшлатăп. Çавăнпа та çырусемпе ĕçлесси малашне те пирĕн ĕçре тĕп вырăнта пулĕ.
В. ШАПОШНИКОВ
калаçнă.