29 мая 2013 г.
Экзаменсем пуçланчĕç
Тунти кун пĕрлехи патшалăх экзаменĕсем пуçланчĕç. 11-мĕшсен пĕрремĕш экзамен вырăс чĕлхипе иртрĕ, ăна кăçал шкул пĕтерекен 243 выпускник тытрĕ. Экзамен вырăнне Муркашри вăтам шкул тесе çирĕплетнĕ. Экзамен пыракан классенче тата коридорсенче требованисемпе килĕшÿллĕн видеосăнав оборудованийĕсене вырнаçтарнă.
Ĕнер вара 9-мĕшсен патшалăх аттестацийĕ пуçланчĕ. 371 çамрăк пĕрремĕш экзамена математикăпа тытрĕ. Тăххăрмĕшсен ĕçĕсене районта йĕркеленĕ комисси тĕрĕслет.
Тĕллевлĕ усă кураççĕ
Амăш (çемье) капиталĕ ăна çирĕплетекен саккун вăя кĕнĕренпе 250 000 тенкĕрен паян 408960 тенкĕ таран ÿсрĕ. Пирĕн районта ăна тивĕçекенсенчен çуррине яхăн – пурĕ 190,02 миллион тенкĕлĕх 607 заявлени çырнă – капитал укçи-тенкипе усă курнă.
Ытларахăшĕ çак пулăшупа пурăнмалли çурт-йĕр условийĕсене лайăхлатнă. 439 çемье ипотека кредичĕсене саплаштарнă, 151 çемье – суту-илÿ килĕшĕвĕ тăрăх пурăнмалли лаптăк туяннă, укçа-тенкĕне пÿрт тунă е ăна реконструкциленĕ çĕре хывнă, çурт-йĕре пая кĕрсе туяннă, хăпартнă пÿртшĕн е ăна реконструкциленĕшĕн компенсаци мелĕпе илнĕ. Çак укçа-тенкĕпе усă курса аслă çулхи ачасене вĕрентме 16 çемье кăмăл тунă.
Марафон вăй илет
«Раççей ача-пăча фончĕ» обществăлла организацин Чăваш Енри уйрăмĕ пуçарнипе йĕркеленĕ «Ачалăхшăн, ачалăх ячĕпе» ыр кăмăллăх марафон малалла пырать.
Пирĕн районта пурăнакансем, кунта вырнаçнă предприяти-учрежденисем тата организацисем хывнă укçа майăн 23-мĕшĕ тĕлне 40812 тенкĕпе танлашнă, малтанхи эрнерипе танлаштарсан кăшт ÿснĕ. Ырă тăвас текенсем кая юлман, марафон счечĕ çине укçа-тенкĕ куçарма хальлĕхе никам та кая юлман.
Республикипе пурĕ 6 миллион та 707 пин те 866 тенкĕ пухăннă.
Н. Николаева.