25 мая 2013 г.
Чăваш Енри «уçă урок» хыççăн парта хушшине республикăри шкулсенче, гимназисемпе лицейсенче – пурĕ 170-е яхăн вĕренÿ учрежденийĕнче вĕренекенсен ашшĕ-амăшĕсем ларчĕç. Çуллахи каникул умĕн ашшĕ-амăшĕсене ачасене пурнăç хăрушсăрлăхĕпе, Интернетри хăрушсăрлăхпа тивĕçтересси пирки калаçма видеоконференци мелĕпе иртнĕ пухăва йыхравларĕç. Пухăва республикăри вĕренÿпе çамрăксен политикин тата информаци политикипе массăллă коммуникацисен министерствисем ирттерчĕç. Ашшĕ-амăшĕсен уçă пухăвне Роскомнадзор, ГИБДД ĕçченĕсем, ача прависен уполномоченнăйĕ тата ыттисем те хутшăнчĕç.
Çакăн пек масштаблă пуху пĕрремĕш хут иртрĕ. Вĕренÿ министрĕн çумĕ С. Кудряшов тата информаци политикин министрĕ В. Андреева ашшĕ-амăшĕсене, директорсемпе класс ертÿçисене, учительсене ачасене хăрушсăрлăхпа тивĕçтерес ыйтăва çуллахи каникул умĕн те, каникул вăхăтĕнче те кун йĕркинчен кăлармалла маррине асăрхаттарса каларĕç.
Чăваш Енри ача прависен уполномоченнăйĕ В. Рафинов пĕлтĕр сентябрьте вăя кĕнĕ «О защите детей от информации, причиняющей вред их здоровью и развитию» Федераллă саккун çинчен аса илтерчĕ. Интернет-услугăсемпе тивĕçтерекенсен тата массăллă информаци хатĕрĕсен тĕп задачисен шутне ачасен сывлăхĕпе пурнăçĕшĕн хăрушлăх кăларса тăратакан информацие сармалла марри кĕнине те каларĕ. Ашшĕ-амăшĕсемпе ачасен вара мĕн пăхма юранипе юраманнине те пĕрле сÿтсе явмалла.
Чăваш Ен тăрăх Роскомнадзор управленийĕн ертÿçин тивĕçĕсене пурнăçлакан Т. Евдокимова паянхи куна массăллă информаци хатĕрĕсен (хаçат-журналсем, радио, телевидени) 75 процентне яхăн хăйĕн продукцине асăннă саккунпа килĕ-шÿллĕн кăларнине палăртрĕ. Интернетра вара кăна йĕрлеме йывăртарах. Çакна Роскомнадзор, Роснаркоконтроль тата Роспотребнадзор пăхса тăраççĕ. Ачасене Интернетри хăрушсăрлăхпа тивĕçтерессипе килĕшÿллĕн хăш-пĕр сайтсем тÿрех усă курма ирĕк паман сайтсен пĕрлехи реестрне лекеççĕ. Апла пулин те Т. Евдокимова ашшĕ-амăшĕсене вĕсен ачисем хăш сайтсене кĕрсе пăхнине тĕрĕслеме сĕнчĕ.
Паян çĕр-шывра кашни 5-мĕш сим-карта ачасен аллинче, çавăнпа та ачасене Интернетпа çыхăнма май паман телефонсем илсе пама, вĕсем Интернетра ирттерекен вăхăта чикĕлеме сĕнчĕç.
Çул-йĕр хăрушсăрлăхĕ пирки уйрăммăн аса илтерсе ГИБДД управленийĕн пуçлăхĕн çумĕ О. Федоров ашшĕ-амăшĕсене хăйсен ачисемпе пĕрле çул-йĕр хăрушсăрлăхĕн правилисене вĕренме сĕннипе пĕрлех транспортри хăрушсăрлăх мелĕсемпе усă курма каланă.
Пирĕн районти шкулсене те çак пуху пуласси пирки маларах пĕлтернĕ. Пухăва хутшăннисем унăн уссине туйрĕç пулĕ.