12 декабря 2012 г.
Пурăнмалли çурт-йĕре тÿлевсĕр майпа приватизацилессин вăхăчĕ вĕçлениччен нумай юлмарĕ. Ăна 2013 çулхи мартăн 1-мĕшĕччен палăртнă. Саккуна вара улшăнусем кĕртнĕ.
Паян çын çав вырăнта пĕр вăхăт пурăнманни социаллă найм килĕшĕвĕн прависемпе тивĕçĕсем улшăннине пĕлтермест. Апла пулсан çурт-йĕрпе усă курма право пур граждансем пурте приватизацие хутшăнма пултараççĕ.
Саккуна улшăнусем кĕртнĕ май халĕ çурт-йĕре приватизациленĕ чухне ирĕк илмелли çынсен хисепне чакарнă. Унччен кун пек ирĕке çемьери пĕрле пурăнакан çул çитнĕ пур çынсенчен те, кунпа пĕрлех 14 – 18 çулсенчи çул çитменнисенчен те илмелле пулнă. Хăйсен приватизацие хутшăнмалли правипе усă курнисен те ирĕк пама тивнĕ. Халĕ ĕнтĕ вĕсенчен ирĕк илмелле мар. Приватизаци правипе усă курманнисем кăна ирĕк пама тивĕç. Калăпăр, ватă çын хăйĕн ачисем патĕнче пропискăра тăрать тата унччен çурт-йĕр приватизацине хутшăннă пулсан, унран ирĕк ыйтмалла мар.
Росреестрăн Чăваш Республикинчи управленийĕн ертÿçин çумĕ Татьяна Васильева çапла каласа парать: «Асăннă улшăнусем нумай граждансене судлашассинчен хăтараççĕ. Хăш-пĕр чухне чăннипех аптăрамалла пулса тухнă. Тепĕр чухне çемьен пĕр-пĕр членĕ унччен хваттер приватизацине хутшăннă пулин те, ку хутĕнче хăйĕн ирĕкне пама килĕшмен. Ÿкĕтлени те, хăратни те пулăшман. Пĕртен-пĕр çул – суда каясси кăна юлнă. Халĕ ку енĕпе чылай ансатрах».
2012 çулта Росреестрăн Чăваш Республикинчи управленийĕнче пурăнмалли 5668 çурт-йĕре килĕшÿпе харпăрлăха панине (приватизациленине) регистрациленĕ. Приватизаци пуçланнăранпа ку кăтарту 181 пин ытла хваттерпе танлашать.
М. ИВАНОВА,
Росреестрăн Чăваш Республикинчи
управленийĕн ертÿçин пулăшаканĕ.