12 декабря 2012 г.
Çак кунсенче бизнес-инкубаторта район администрацийĕн пуçлăхĕ çумĕнчи пĕчĕк тата вăтам предпринимательство аталанăвĕн Канашĕн черетлĕ ларăвĕ пулчĕ. Ăна МСО "Моргаушская" акционерсен хупă обществин генеральнăй директорĕ, депутатсен районти Пухăвĕн депутачĕ, обществăлла канашăн членĕ, предпринимательсен канашĕн ертÿçи В. Семенов уçрĕ тата ертсе пычĕ.
Кун йĕркинчи пĕрре-мĕш ыйту республика шайĕнчи «Çулталăкри предприниматель» конкурса хутшăнма тивĕçлĕ кандидатсем суйласси тата вĕсен ĕç-хĕлне пăхса тухасси пулчĕ. Конкурса тĕрлĕ номинаципе пĕтĕм-летеççĕ. Палăртма кăмăллă, пĕчĕк тата вăтам предпринимательство субъекчĕсем ял хуçалăх ĕçĕнче, обществăлла апатланура, суту-илÿре тата ытти енĕпе пуçаруллă тимлеççĕ. Çавăнпа та асăннă конкурса хутшăнма тивĕçлисем те пĕрре кăна мар пулчĕç.
«Муркаш пасарĕ» муниципаллă унитарлă предприяти ертÿçи тата бизнес-инкубаторти ĕç-хĕле йĕркелесе ертсе пыракан Н. Субботин пĕчĕк тата вăтам предпринимательство субъекчĕсене консультаци, информаци, йĕркелÿпе методика пулăшăвĕ парас ĕç епле пынипе паллаштарчĕ. Çавăн пекех бизнес-инкубаторти юлашки вăхăтри улшăнусем çинче райадминистрацин экономика тата агропромышленность комплексĕн аталанăвĕн пайĕн пуçлăхĕ Н. Костина чарăнчĕ.
Муркаш район центрĕ виçĕ пинрен тытăнса пилĕк пин таран çын пурăнакан пысăк калăпăшлă ял шутланать. Акă, тĕслĕхрен, выльăх чирĕсемпе кĕрешекен районти станцирен тухар та сĕт-çу заводне çул тытар. Вăхăчĕ сахал мар иртет, çавăн пекех тепĕр вĕçĕнчен тухса бизнес-инкубатора çитсе килме те. Ку ыйту чылайăшне хумхантарать. Çакна тĕпе хурса Муркашра обществăлла транспорт çÿреттерес ыйту патне тепĕр хут таврăнчĕç ларăва пухăннисем. Халĕ ку енĕпе хăш-пĕр ĕç пуçланнă та ĕнтĕ. Çитес вăхăтра çынсен ыйтăвне туллин тивĕçтерессе кĕтекенсем чылай.
Р. Илларионова.