18 мая 2013 г.
Республика кунĕччен уйăх ытларах кăна юлать. Мăн Сĕнтĕр ял тăрăхĕн территорийĕнче пурăнакансемшĕн вăл уйрăмах асра юлĕ. Уяв умĕн Мăн Сĕнтĕрте культурăпа кану центрне уçма палăртаççĕ. Паян кунта курав залĕнче строительство ĕçĕсем пыраççĕ. Кунти ĕçсем мĕнле пынипе Чăваш Республикин культура, национальноç тата архив ĕçĕсен министрĕ В. Ефимов паллашнă.
Вадим Петрович район администрацийĕн пуçлăхĕпе Р. Тимофеевпа, район администрацийĕн пуçлăхĕн çумĕпе – капиталлă строительство тата обществăлла инфраструктурăна аталантарассин управленийĕн пуçлăхĕпе В. Никитинпа, культура тата архив ĕçĕсен пайĕн пуçлăхĕпе Е. Черновăпа пĕрле подрядчиксемпе тĕл пулнă, кулленхи ыйтусене вырăнта сÿтсе явнă.
Ĕç планеркине çавăн пекех Мăн Сĕнтĕр ял тăрăхĕн пуçлăхĕ А. Лаптев, «ПМК «Водоснабжения» ООО генеральнăй директорĕ В. Павлов, «Ядрингазсервис» ООО прорабĕ В. Сидоров, Мăн Сĕнтĕрти культурăпа кану центрĕн директорĕ И. Зайцев хутшăннă.
Чăваш Республикин культура, национальноç тата архив ĕçĕсен министрĕ В. Ефимов тата ĕç планеркине хутшăннисем культура учрежденийĕн пур пÿлĕмĕсене те, таврари территорие те пăхса çаврăннă. Министр хăй кунта юлашки хут пулнăранпа мĕн-мĕн тунипе интересленнĕ. Унччен вара вăл асăннă объектра пĕрлехи информаци кунĕ чухне кăçалхи март уйăхĕнче пулнăччĕ.
«ПМК «Водоснабжения» ООО генеральнăй директорĕ В. Павлов строительсен малашнехи ĕçĕсем çинчен каласа панă. Вăл палартнă тăрăх предприяти строительство ĕçĕсене июнĕн 10-мĕшĕ тĕлне вĕçлет. Газ кĕртессипе, карта тытассипе те чăрмав пулмалла мар. Çывăх вăхăтрах строительсем территорие тирпей-илем кĕртме пуçăнаççĕ.
«Ядрингазсервис» ООО ĕçченĕсем те активлăх кăтартаççĕ. Вĕсем культурăпа кану центрĕнчи шалти ĕçсене июнĕн 1-мĕшĕ тĕлне вĕçлеме палăртаççĕ.
Ĕç планерки вăхăтĕнче В. Ефимов тата Р. Тимофеев хăш-пĕр енпе асăрхаттарусем тунă, сĕнÿсем панă. Объекта хута ямалли срока палăртнă – июнĕн 10-мĕшĕ. Ростислав Николаевич палăртнă тăрăх объекта савăнăçлă лару-тăрура уçнине районăн юбилейлă «Акатуйне» тата, паллă ĕнтĕ, Республика кунне халаллаççĕ.