01 декабря 2012 г.
Раççей Пенси фончĕ Кÿкеçри интернатсенче юсав ĕçĕсем туса ирттерме тата Шупашкар районĕн социаллă пулăшу центрĕ валли автомашина туянма 4,3 миллион тенкĕ уйăрса панă. Çавăн чухлех республика бюджетĕнчен финансланă.
Ытларах суммăна ватă çынсемпе инвалидсен интернат çуртне тата ăс-тăн енчен аталанса çитеймен ачасен интернат çуртне юсама уйăрнă. Районти социаллă пулăшу центрĕнче уйăрнă укçа-тенкĕпе вара ватă çынсене васкавлă социаллă тата медицинăпа социаллă услугăсем паракан мобильнăй бригада валли автомашина килсе çитĕ.
Республикипе пĕтĕмĕшле Чăваш Енĕн социаллă программисене пурнăçлама 2012 çулта Раççей Пенси фончĕ 25,5 миллион тенкĕ уйăрнă. Вăл шутран Чăваш Республикин Пуçлăхĕн Михаил Игнатьевăн пуçарăвĕпе РФ Пенси фондĕнчен хушма укçа 18,5 миллион тенкĕ уйăрма май килнĕ. Пуçарăва çирĕплетсе республика бюджетĕнчен те çавăн чухлĕ сумма уйăрнă. Мĕншĕн тесен социаллă программăна Раççей Пенси фончĕпе Чăваш Республикин Правительстви пĕр шайра финанслаççĕ.
Укçа-тенкĕне социаллă 6 учрежденире капиталлă юсав ĕçĕсем тума, ватă çынсене васкавлă социаллă тата медицинăпа социаллă услугăсем паракан мобильнăй бригадăсем валли 9 автомашина туянма уйăрнă.
Социаллă программăра çавăн пекех ĕçлемен пенсионерсене адреслă социаллă пулăшу пама укçа-тенкĕ уйăрассине те пăхса хăварнă. Пĕр хут паракан пулăшăва ватлăха пула е инвалида тухнине пула Пенси фончĕн органĕсем урлă ĕç пенсийĕ илсе тăракан, йывăр лару-тăрăва лекнĕ ĕçлемен пенсионерсем тивĕçеççĕ. Адреслă пулăшу парассине тата унăн виçине пенсионер заявленине кура социаллă хÿтлĕх органĕ палăртать.
Раççей Пенси фончĕ регионсен бюджечĕсенчен пĕр шайрах финанслассин йĕркипе социаллă программăсене пурнăçлама 2000 çултан тытăнса хутшăнать. 12 çул хушшинче Пенси фончĕ Чăваш Республикине çапла майпа 252 миллион ытла тенкĕ укçа уйăрса панă. Вăл шутран 74 миллион тенкĕ – ĕçлемен пенсионерсене адреслă пулăшу пама. 178 миллион тенкĕ социаллă пулăшу центрĕсен пурлăхпа техника базине çирĕплетме уйăрнă.