01 декабря 2012 г.
Çапла палăртрĕ Раççей Федерацийĕн Патшалăх Думин депутачĕ Руслан Тихонов ноябрĕн 29-мĕшĕнче пирĕн районта пулса курнă май
Район администрацийĕн пуçлăхĕпе Ростислав Тимофеевпа пĕрле вăл малтанах Москакассинче вырнаçнă «Шупашкарти «Сеспель» предприяти» акционерсен хупă обществине çитсе курчĕ. Хальхи вăхăтра ÿсĕмлĕ те тухăçлă ĕçлекен пысăк предприятипе унăн директорĕ Владимир Бакшаев паллаштарчĕ. Сăмах май Патшалăх Думин депутачĕ кунта пĕрремĕш хут. Çавăнпа та тĕнче шайĕнче палăрса тăракан предприяти ĕçĕ-хĕлĕпе вăл интересленсех паллашрĕ, кунта пулса курнипе кăмăллă юлчĕ.
Ку предприяти пирки чылай калама пулать. Кĕскенреххĕн пулсан вара çавна асăнса хăвармалла. Заводра Европăри чылай çĕр-шывсенчи тĕнче шайне тивĕçтерекен оборудовани вырнаçтарнă. Кунта туса кăларакан цемент, çăнăх, çунтармалли-сĕрмелли материалсем, нефть, битум, шыв, комбикорм, хими продукцийĕ т. ыт. турттармалли çурма прицеплă цистернăсене ытти çĕр-шывсенче хаваспах туянаççĕ. Продукци пахалăхăн тĕнче стандарчĕн пур требованийĕсене те тивĕçтерет.
Предприяти вырăнта тăмасть. Туса хатĕрлекен продукци тĕсĕсене ÿстерессине, производство хăвачĕсене аталантарассине, чи çĕнĕ технологи мелĕсене пурнăçа кĕртессине кунта малти вырăна хураççĕ.
Предприяти районшăн пысăк пĕлтерĕшлĕ пулнине район администрацийĕн пуçлăхĕ Ростислав Тимофеев та палăртрĕ. Районĕпе пĕтĕмĕшле туса кăларакан промышленноç продукцийĕн калăпăшĕнче «Сеспель» тÿпи 80 ытла процент йышăнать вĕт-ха.
Кайран Руслан Кронидович районти тĕп больницăра пулса курчĕ. Сăлтавсăр мар. Больницăн стационарĕ çак вăхăта тивĕçтерет пулин те, поликлиникăн çĕнĕ çуртне тумах тивет. Халĕ вăл кунсерен 300 çын йышăнмалăх. Тĕрĕссипе вара 700 çын таран та йышăнма тивет. Тĕп больницăн тĕп врачĕ Владислав Данилов каласа панă тăрăх çĕнĕ объект валли вырăнĕ те пур ĕнтĕ, проекчĕ те экспертиза витĕр тухнă. Çĕнĕ поликлиника 500 çын йышăнмалăх пулмалла. Укçа-тенкĕ ыйтăвне татса памалла пулать кăна.
Патшалăх Думин депутачĕ çавăн пекех кадрсен ыйтăвĕпе, сывлăх сыхлав ĕçченĕсен ĕç условийĕсемпе, вĕсен шалăвĕпе тата ытти ыйтусемпе те интересленчĕ, поликлиникăра пулса курчĕ. Кадрсен ыйтăвне кунта татса панă темелле. Специалистсем çитменни сисĕнмест. «Земство тухтăрĕ» программăпа килĕшÿллĕн кăна Муркаш районĕнче çуралса ÿснĕ 7 врач района ĕçлеме таврăннă. Врачсен шалăвĕ 20 – 21 пин тенкĕпе танлашать.
Çав кун депутатсен районти Пухăвĕн депутачĕсем, ял тăрăхĕсен пуçлăхĕсем депутатсен районти Пухăвĕн «Чăваш Республикинчи Муркаш районĕн 2013 çулхи тата планланă 2014 – 2015 çулсенчи тапхăрти бюджечĕ çинчен» йышăнăвĕн проектне халăхпа сÿтсе явнă çĕре хутшăнчĕç. Хыççăн вĕсемпе РФ Патшалăх Думин депутачĕ Руслан Тихонов тĕл пулма кăмăл турĕ.
Руслан Кронидович хăйĕн кулленхи, Патшалăх Думинчи ĕçĕ-хĕлĕ, тĕрлĕ саккунсене хатĕрленĕ çĕре хутшăнни çинчен каласа пачĕ, Думăри политика партийĕсен фракцийĕсем, уйрăм депутатсем çинче чарăнса тăчĕ. «Единая Россия» фракцин Думăра хăйĕн пĕчĕкрех 4 ушкăн. Саккунсене сÿтсе явнă çĕре кашни депутат активлă хутшăнать. Вĕсене йышăннă чухне граждансен сĕнĕвĕсене, шухăшĕсене шута илмесĕр хăвармаççĕ.
Руслан Тихонов çавна та палăртсах каларĕ: «Чăваш Республики – Атăл çи федераллă округра тăнăç регионсен шутĕнче. Муркаш районĕ вара – республикăра малтисенчен пĕри. Ĕçчен халăх пурăнать Муркаш тăрăхĕнче».
Тĕл пулура депутат патне ыйтусем те пулчĕç. Пухăннисене вĕрентÿ çинчен калакан саккун проектне хатĕрлесси, ялсенче çулсем тăвасси, ялта пурăнакансене ĕçмелли пахалăхлă шывпа тивĕçтересси, Аслă Отечественнăй вăрçă участникĕсене тата вăрçăра вилнĕ салтаксен тăлăх арăмĕсене хăйсен пурăнмалли çурт-йĕрне тĕпрен юсама укçа-тенкĕ тĕлĕшĕнчен пулăшма май тупасси интереслентереççĕ. Руслан Тихонов вĕсем çине тулли хуравсем пачĕ.
В. ШАПОШНИКОВ.