01 декабря 2012 г.
Ăнăçу никĕсĕ çĕнĕ технологисемпе ĕç йĕркелĕвĕнче пулни вăрттăнлăх мар. Анчах вĕсене алла илесси нумай чухне йывăррăн пулса пырать е тепĕр чух пачах та вырăнтан тапранаймасть. Çапла вара çĕнĕ технологисемпе çĕнĕлле шухăшлав тесе каçса кайсах калаçни ытларах чух сăмах çинчех юлать.
Пĕр вырăнта тăракан вуншар предприяти хушшинче те çĕнĕлĕхсемпе хĕç-пăшалланса малалла сулмаклă утакансем те пур-ха пирĕн хушăмăрта. Вĕсен ĕçĕпе тата мал туртăмлă аталанăвĕпе паллашни ыттисене те çĕнĕлĕхсем тĕлĕшпе хăюллăрах пулма хистессе шанас килет паян.
Чÿк уйăхĕн 28-мĕшĕнче «Путь Ильича» агрофирмăн Шаптакри сĕт ферми çывăхĕнче выльăх-чĕрлĕх ĕрчетмелли çĕнĕ производство комплексĕ хута кайрĕ. Çав ятпа ирттернĕ савăнăçлă митинга Чăваш Республикин Пуçлăхĕ Михаил Игнатьев та килсе çитрĕ. Районти агропромышленность комплексĕн аталанăвне пурнăçа кĕрекен çĕнĕ комплекса хута янă çĕрте Чăваш Республикин Министрсен Кабинечĕн Председателĕн пĕрремĕш çумĕ Сергей Павлов, ЧР Патшалăх Канашĕн комитет председателĕ тата «Единая Россия» политика партийĕн регионти политканашĕн секретарĕ Николай Малов, «Россельхозбанк» акционерлă обществăн Чăваш регионĕнчи филиалĕн директорĕ Ирина Письменская, ЧР Патшалăх Канашĕн депутачĕ Николай Ванеркин, район администрацийĕн пуçлăхĕ Ростислав Тимофеев, районти хуçалăхсен ертÿçисемпе специалисчĕсем хутшăнчĕç.
Пухăннисене «Путь Ильича» агрофирма» чикĕллĕ яваплăхлă обществăн генеральнăй директорĕ Олег Дельманпа унăн ашшĕ Александр Дельман хута каякан çĕнĕлĕхсен кашни утăмĕпе тĕплĕн паллаштарчĕç.
Çĕнĕ сĕт комплексĕнче 500 ĕне пулĕ. Вĕсене пăхса усрама кунта паянхи куна чи малта пыракан технологисемпе ĕçлĕç. Çакнашкал çĕнĕлĕх района килсе кĕни савăнтарать кăна. Хăйĕн савăнăçне Чăваш Республикин Пуçлăхĕ М. Игнатьев та пытармарĕ:
– 20 çул каялла мана çакăн пек ферма тăвасси пирки каланă пулсан эпĕ ĕненмĕттĕм. Паян вара ку – пирĕн пурнăç чăнлăхĕ, агробизнес аталанăвĕн черетлĕ утăмĕ. Европăри фермерсенчен вуншар çул юлса пынине эпир паян хăвăрттăн çитсе пыратпăр. Кама савăнтармĕ çакă; Пурне те тивĕçтерекен çĕнĕлĕхе çул панă ЧР Патшалăх Канашĕн депутатне, «Путь Ильича» агрофирмăн гендиректорне Олег Дельмана куншăн пысăк тав. Унăн тĕслĕхне алла илсе ытти предпринимательсем те рынок хутшăнăвĕсен тапхăрĕнче ял хуçалăхне инвестицисем хывма шикленмессе шанас килет.
Çĕнĕ технологисем çинче никĕсленнĕ 200 миллион тенкĕне яхăн «Россельхозбанкран» илнĕ кредитпа ĕçе кĕртнĕ комплекс 1000 сумалли ĕнелĕх проектăн çурри кăна-ха. Пысăк ĕçе пуçăннă инвесторсем çур çулта чарăнса тăмасса уява пынă кашни çын никам каламасăрах ăнланчĕ. Çапла пултăрччĕ те!
А. БЕЛОВ.