28 ноября 2012 г.
Иртнĕ эрне кун районта ĕçлекен çамрăксен вуннăмĕш спартакиади пулчĕ. Вăл çулсеренех «Çамрăксем – сывă пурнăç йĕркишĕн!» акци вăхăтĕнче иртет. Кăçал спартакиадăра ял тăрăхĕсенчен тата предприятисенчен пуçтарăннă çичĕ команда вăй виçрĕ.
Ăмăрту программине яланхи пекех тĕрлĕ енлĕ те пуян хатĕрленĕ. Бассейнра иртнĕ эстафетăра арçынсем 50-шар, хĕрарăмсем 25-шер метр ишсе ăмăртрĕç. Ку енĕпе Çатракасси ял тăрăхĕн команди мала тухрĕ.
Çак команда алăпа туртăнассинче те, кĕлетке çĕклессипе те, дартсра та (хĕрарăмсем), теннисра та (арçынсем) малти вырăнсене йышăнма пултарчĕ.
Волейбол вăййисем те яланхи пекех интереслĕ те хĕрÿ иртрĕç. Районти ачасемпе çамрăксен спорт шкулĕ – «Сывлăх» ФСК спорт залĕ кĕрлесе кăна тăчĕ. Кунта мала тухма пултараканнисем Çатракасси, Оринин, Шетмĕпуç тата Чуманкасси ял тăрăхĕсен командисем пулчĕç. Финалти вăйăн юлашки минучĕсенче Орининсем Чуманкасси ял тăрăхĕн командине парăнтарса çĕнтерÿçĕ пулса тăчĕç.
Вĕрен туртассипе те Орининсем малта пулчĕç.
Пĕтĕмлетÿпе 1-мĕш вырăна Çатракасси ял тăрăхĕн команди тухни паллă пулчĕ. 2-мĕш вырăнта – Оринин ял тăрăхĕ, 3-мĕш вырăнта – Шетмĕпуç ял тăрăхĕ.
Хамăр инф.