24 ноября 2012 г.
Раççейри амăшĕн кунне халалланă мероприятисем районта анлă иртрĕç. Ноябрĕн 23-мĕшĕнче Чăваш наци телевиденийĕн ĕçченĕсем сакăр паттăр-ывăл çуратса ÿстернĕ, 1 степень Аслă Петĕр орденне тивĕçнĕ, Чăваш Республикин Ĕç мухтавĕн тата паттăрлăхĕн хисеп кĕнекине кĕртнĕ тата ытти чылай хисепе тивĕçнĕ Татьяна Николаева палăкĕ умĕнче пулчĕç. Вĕсем кунта чăн-чăн чăваш хĕрарăмĕн ĕçĕ-хĕлĕпе паллашма пултарчĕç, пуç тайса чĕрĕ чечексем хучĕç.
Çавăн пекех районти тури чăвашсен музейĕнче сумлă хĕрарăма чысласа ятарлă кĕтес уçнă. Паттăрлăх кăтартнă çемье кун-çулĕ çинчен тĕплĕнрех пĕлме пулать. Кунтах Татьяна Николаевна çĕленĕ кĕпе, вăл тырă вырнă çурла, ывăлĕсен çырăвĕсем тата ытти те.
Мероприятие тăснă май кунта пухăннисем тури чăвашсен музейĕнчи тĕрлĕ тематикăллă экспонатсемпе паллашрĕç. Ача амăшĕсене район администрацийĕн пуçлăхĕ Р. Тимофеев, социаллă хÿтлĕх пайĕн ертÿçин тивĕçĕсене пурнăçлакан Н. Васильева тата ыттисем саламларĕç. Кунта килнĕ амăшĕсем Раççей тата Чăваш Республики шайĕнчи ача амăш капиталĕн сертификачĕсене тивĕçрĕç.
Р. Илларионова.