17 ноября 2012 г.
Кĕçнерни кун, ноябрĕн 15-мĕшĕнче, кĕркуннехи призыври Чăваш Енĕн чи хастар яшĕсене Президент полкне ăсатрĕç. Ку чыса Чуманкасси ял тăрăхĕнчи Исетерккĕ ялĕнче çуралса ÿснĕ Николай Илларионов та тивĕçрĕ.
Çак полка лекме çăмăл мар. Кунта яланах конкурс питĕ пысăк. Çамрăксене пур енлĕн тĕплĕ тĕрĕслеççĕ. Сывлăх тĕлĕшĕнчен те, шкулта мĕнле ĕлкĕрсе пынине те, несĕл тымарĕсене те тишкереççĕ, славян халăхĕн сăн-пичĕ пулнине те шута хураççĕ.
Чăваш Республикин Министрсен Кабинечĕн председателĕ Иван Моторин яшсене саламланă май Республика Пуçлăхĕн халал сăмахĕсемпе пĕрлех кĕсье телефонĕсем те парнеленĕ.