14 ноября 2012 г.
Район администрацийĕн пуçлăхĕн пĕрремĕш çумĕ В. Ананьев Ял хуçалăхĕнче тата продукци тирпейлекен промышленноçра ĕçлекенсен кунне халалланă савăнăçлă пухăва хатĕрленсе ирттерессипе ĕçлекен йĕркелÿ комитечĕн черетлĕ ларăвне ирттернĕ. Асăннă мероприяти ноябрĕн 16-мĕшĕнче районти Культура çуртĕнче (ял тăрăхĕсем хушшинчи информаципе кану центрĕнче) иртет.
Савăнăçлă пухура ял ĕçченĕсем кăçалхи 10 уйăхри экономикăпа социаллă пурнăç аталанăвĕн итогĕсене пĕтĕмлетеççĕ, ĕçре мала тухнисене чыслаççĕ.
Уява ял хуçалăх отраслĕн ветеранĕсене те йыхравлаççĕ. Пуху пуçланиччен вĕсем «Путь Ильича» агрофирмăра пулса курма палăртаççĕ.
Пухăва ял хуçалăх предприятийĕсен делегацийĕсемпе пĕрлех ял тăрăхĕсен пуçлăхĕсем те хутшăнĕç. Районти продукци тирпейлекен промышленноç предприятийĕсем хăйсен продукцине туянма сĕнĕç.
Паллă ĕнтĕ, уяв программи ташă-юрăран пуян пулĕ. Пухăннисене художество пултарулăх коллективĕсем, чăваш эстрада артисчĕсем савăнăç кÿрĕç.