10 ноября 2012 г.
Ĕçпе тивĕçтерекен центр ĕçсĕррисене пособисем тÿлесе тăрса кăна пулăшмасть, юрăхлă ĕç суйласа илме те, çĕнĕ профессисене вĕренме те майсем туса парать. Кунсăр пуçне мал туртăмлисене хăйсен ĕçне пуçарса яма та пулăшу кÿрет. Çакă вара ял çыннишĕн уйрăмах пĕлтерĕшлĕ.
Районта ĕçпе тивĕçтерекен центрта ĕçсĕррисем шутĕнче учетра тăракансенчен хăйсен ĕçне пуçарас текенсем пур-и; Мĕнле ĕç-хĕл суйласа илеççĕ вĕсем; Çакăн пирки каласа пама пулчĕ районти ĕçпе тивĕçтерекен центрăн ертсе пыракан специалисчĕ Марина ОСИПОВА:
– Кăçал çулталăк пуçланнăранпа ĕçпе тивĕçтерекен центрта учетра тăракансенчен 3 çын патшалăх пулăшăвĕпе усă курса хăйĕн ĕçне пуçарма кăмăл турĕ. Çавна валли вĕсем ĕçпе тивĕçтерекен центр урлă 58 пин те 800-шер тенкĕ патшалăх пулăшăвĕ илчĕç. Çĕньял Муркашри Игорь Рожков путенесем, Мемеккассинчи Галина Ершова сыснасем, Катькасри Андрей Романов бройлерсем пăхса усрама пуçăнас кăмăллă пулчĕç.
Акă унччен ĕçсĕррисем шутĕнче пулнă Игорь Рожковăн специальноçĕ – тракторист-машинист. 2009 çулччен вăл хуралçăра ĕçленĕ. Районти ĕçпе тивĕçтерекен центра пыриччен вара ниçта та ĕçлемен, килти хушма хуçалăха тытса тăнă.
Районти ĕçпе тивĕçтерекен центр специалисчĕсем ăна патшалăх пулăшăвĕпе усă курса хăйĕн ĕçне пуçарма сĕнчĕç. Çавна валли патшалăх 58,8 пин тенкĕ субсиди уйăрса парать.
Игорь Иванович килĕшрĕ. Ĕçпе тивĕçтерекен центр урлă вăл чăх-чĕп пăхса усрассипе ятарлă курссене вĕренсе пĕтерчĕ. Вăл çапла тĕв турĕ – путенесен хуçалăхне йĕркелемелле.
Пуçласа чăх-чĕп ĕрчетекенĕн ăсталăхне алла илекен предпринимателĕн шухăшĕпе кун йышши чăх-чĕпе ĕрчетни усăллă та, тупăшлă та. Мĕншĕн тесен апат ытлашши нумай кирлĕ мар, çăмартине вара час-час тăваççĕ. Çапла вара вăл бизнес-план хатĕрлерĕ, ĕçпе тивĕçтерекен центр урлă 58,8 пин тенкĕ патшалăх субсидине илчĕ те хăйĕн ĕçне кÿлĕнчĕ.
Предприниматель хăйĕн бизнесне 200 пуç путене туяннинчен пуçларĕ. Читлĕх-клеткăсем майлаштарчĕ. Вĕсене хăв аллупа тусан çĕннисене туяннинчен икĕ хут йÿнĕрех кайса ларать иккен. Халĕ вăл ерипен чăх-чĕп ĕрчетессин вăрттăнлăхĕсене алла илсе пырать.
Конкуренци шиклентермест-и тесе ыйтсан Игорь Иванович çапла хушса хурать: «Манăн пысăк хуçалăх мар вĕт-ха. Ун пек хăрушлăх çук тесе шухăшлатăп. Пысăк хуçалăх йĕркелесси вара паянхи кун çăмăлах мар».
Хальхи вăхăтра вăл хуçалăхра çитĕнтернĕ путене чĕпписемпе çăмартасем сутассипе ĕçлет. Çитес вăхăтра вара ферма хуçи чĕпсем валли çĕнĕ вите йĕркелеме, вĕсен йышне икĕ хут ÿстерме планлать.
В. ШАПОШНИКОВ
калаçнă.