24 октября 2012 г.
Районта «Çамрăксем сывă пурнăç йĕркишĕн» акци пырать. Çавна май район администрацийĕн вĕрентÿ тата çамрăксен политикин пайĕн специалисчĕсем маларах палăртса хунă мероприятисене пурнăçлассипе тăрăшаççĕ.
Акци вăхăтĕнче кашни шкултах «Вĕренÿ тата сывлăх» шкул программине хатĕрлекен тата малашне пурнăçа кĕртекен ятарлă канашсем тума палăртнă. Кунсăр пуçне октябрь–ноябрь уйăхĕсенче район шайĕнче кăна мар, пур вĕрентÿ учрежденийĕнче те тĕрлĕ спорт ăмăртăвĕсем, ятарлă тренингсем, сывă пурнăç йĕркине халалланă калаçусем чылай иртĕç. Ачасемпе çамрăксем тематика буклечĕсем кăларса районти конкурса та хутшăнĕç.
Октябрĕн 22-мĕшĕнче акă «Çамрăксене преступлени тăвассинчен асăрхаттарасси» ятпа районти çамрăксен пĕрлехи информаци кунĕ иртрĕ. Вырăнсенчи çамрăксен канашĕсен, шкулсенчи обществăлла организацисен ертÿçисемпе пĕрлех унта Шалти ĕçсен министерствин районти пайĕн сотрудникĕсем те, психологсемпе врачсем те хутшăнчĕç. Информаци кунне хутшăннисем пĕр-пĕринпе тачă çыхăнура ĕçлеме тата çак ĕçпе вырăнсенче кая юлмасăр паллаштарма килĕшсе татăлчĕç.
Район хаçачĕ те «Çамрăксем сывă пурнăç йĕркишĕн» акцие хутшăнмасăр юлмасть. Ноябрĕн 10-мĕшĕччен ачасемпе çамрăксем те, аслă ăрурисем те редакцие «Эпĕ сиенлĕ йăласене хирĕç» ятпа çырнă материалсем çырса конкурса хутшăнма пултараççĕ. Материалсене тĕрлĕ жанрта çырма юрать: заметка, интервью (тен пирус туртма е эрех ĕçме пăрахнă çынсемпе калаçма май пур), репортаж тата ытти те. Чи интереслисене ноябрĕн 15-мĕшĕнче паллă тăвакан Пируссăр пĕтĕм тĕнчери куна халалланă «Сывлăхлă пулар» кăларăмра пичетлетпĕр. Конкурс çĕнтерÿçисене дипломсем те кĕтеççĕ.
Материалсене çырупа Муркаш сали, Мир урамĕ, 9А çурт адреспа е morpress@cbxĕruĔ redaction@cbxĕru электронлă адрессемпе конкурса тесе палăртса ярса пама пултаратăр.
Н. Николаева.