20 октября 2012 г.
Октябрĕн 18-мĕшĕнче ял тăрăхĕсен пуçлăхĕсен канашлăвĕ иртрĕ. Канашлăва район администрацийĕн пуçлăхĕ Ростислав Тимофеев, унăн çумĕсем Владислав Ананьев, Владимир Никитин, Лилия Тарасова, ытти ответлă ĕçченсем хутшăнчĕç.
Канашлура пăхса тухнă ыйтусем шучĕпе те сахал мар, хăйсен пĕлтерĕшĕпе те пысăк вырăн йышăнаççĕ, пурте паянхи кунпа çыхăнса тăраканскерсем.
Чи малтанах ял тăрăхĕсен территорийĕсенчи шыв башнисенех илер. Вĕсемпе усă курассинче çак вăхăта тивĕçлĕ йĕрке çук-ха. Башньăсем ял тăрăхĕсем, пурăнмалли çурт-йĕрпе коммуналлă хуçалăх çинчисем те, пĕрлешÿллĕ хуçалăхсен шутланаканнисем те, хуçасăррисем те пур. Ку тĕлĕшпе саккунпа пăхса хунă тивĕçлĕ йĕрке вара кирлех.
Çĕнĕ урамсене электрификацилес енĕпе те татса паман ыйтусем пур. Çулталăк вĕçленсе пырать, çав хушăрах ĕçсене вăхăтра вĕçлессипе иккĕленÿ çуратакан объектсем çук мар. Уйрăмах çакна ĕçсене «СтройГрантГруп» чикĕллĕ яваплăхлă общество пурнăçлакан объектсем пирки каламалла.
Тăлăх ачасене, нумай ачаллă çемьесене пурăнмалли çурт-йĕрпе тивĕçтерес, нумай ачаллă çемьесене тÿлевсĕр çĕр участокĕсем уйăрса парас ыйтусем те кун йĕркинчех тăраççĕ. Çавна валли резервлă çĕр участокĕсем пăхса хурассипе вырăнсенче çине тăрса ĕçлени кирлĕ.
Яланхи пекех çулсене йĕркеллĕ пăхса тăрасси, юсав ĕçĕсене пурнăçласси ыйтусем çуратаççĕ. Задача – ноябрĕн 12-мĕшĕччен юсав ĕçĕсене вĕçлесси. Унсăрăн кая юлма та пулать. Çав тĕллевпе уйăракан укçа-тенкĕ те ун чухне усă курмасăрах юлĕ.
Çĕр пайĕсене саккунпа килĕшÿллĕн регистрацилес, вĕсемпе тĕллевлĕ усă курас, çĕр участокĕсемпе усă курнăшăн аренда тÿлевĕ илес ыйтусем пирки те сăмах пычĕ канашлура.
Район администрацийĕн финанс пайĕн пуçлăхĕ Рената Ананьева ял тăрăхĕсем 2012 çулхи бюджета кăçалхи 9 уйăх итогĕсемпе мĕнле пурнăçланине тишкерчĕ, 2013 çул валли тата планланă 2014 – 2015 çулсем валли хатĕрлессин ыйтăвĕсене хускатрĕ. Ку тĕлĕшпе те ял тăрăхĕсен пуçлăхĕсен тимлемелли пайтах.
«Россельхозбанкăн» районти хушма офисĕн управляющийĕ Ирина Павлова хушма хуçалăхсене аталантарма кредитсем уйăрса парасси пирки сăмах пуçарчĕ, ытти пулăшу мелĕсем çинче чарăнчĕ, ял тăрăхĕсен пуçлăхĕсене те ку тĕлĕшпе тачăрах çыхăнса ĕçлеме чĕнсе каларĕ.
Иртнĕ суйлавра октябрĕн 14-мĕшĕнче Муркаш ял тăрăхĕн пуçлăхĕ пулма Сергей Ермолаева, Чуманкасси ял тăрăхĕн пуçлăхĕ пулма Николай Белова, Йÿçкасси ял тăрăхĕн пуçлăхĕ пулма Анатолий Кузьмина суйланă. Вĕсене çав ятпа район администрацийĕн пуçлăхĕ Ростислав Тимофеев, ыттисем саламларĕç, ответлă ĕçре ăнăçусем сунчĕç. Райадминистраци пуçлăхĕн çумĕ, йĕркелÿпе кадрсен, право енĕпе тивĕçтерессин тата вырăнти хăй тытăмлăх органĕсемпе ĕçлекен пай пуçлăхĕ Лилия Тарасова ял тăрăхĕсен çĕнĕрен суйланнă пуçлăхĕсене удостоверенисем пачĕ.
В. ШАПОШНИКОВ.