17 октября 2012 г.
Иртнĕ каникул вăхăтĕнче районти пур шкулта та ĕçпе кану, профильлĕ тата сывлăха çирĕплетмелли лагерьсем ĕçлерĕç. «Кĕр парнисем» ярмăрккă кунĕнче шкулсем те хăйсен çуллахи ĕç тапхăрне пĕтĕмлетрĕç.
Районта йĕркеленĕ 29 профиль лагерĕнче пурĕ 1352 ача хăйсен тавра курăмне аталантарнипе пĕрлех сывлăха çирĕплетме пултарнă. Тĕрĕсрех каласан вĕсене валли лагерьти воспитательсем майсем туса панă. Ку енĕпе Йÿçкассинчи вăтам шкулти, Шетмĕпуçĕнчи, Атапайри, Сыпайри тĕп шкулсен ĕçне дипломсем парса хакларĕç. Шурчари тĕп шкулти «Олимпиец» профиль лагерĕн ĕçне вара ку номинацире чи лайăххи тесе палăртрĕç.
Сывлăха çирĕплетмелли лагере 21 кун хушши çÿренĕ 918 ача та ĕçрен аякра тăман. Çак лагерьсенчи ĕç-хĕл те питĕ интереслĕ пулнине палăртса Шурчари тата Шомикри тĕп шкулсене асăнчĕç. Чуманкассинчи вăтам шкула ку енĕпе мала тухнине çирĕплетсе çĕнтерÿçĕ дипломĕпе чысларĕç.
Чуманкасси шкулĕнчи çамрăксен «Пчелки» ĕç бригадине директорăн воспитани енĕпе ĕçлекен çумĕ Валентина Николаевна Николаева (сăн ÿкерчĕкре сылтăмра) ăста ертсе пынине те район шайĕнче палăртса дипломпа наградăларĕç. Çак шкулта вăй хуракан биологи тата хими вĕрентекенĕ Елена Ивановна Кадыкова ертсе пынипе шкулти сăнавпа опыт участокĕн ĕçне районти ытти шкулсенчен лайăхрах йĕркеленине палăртса çĕнтерÿçĕ дипломĕпе чысларĕç. Вĕсен ĕçтешĕ, технологи тата ÿкерчĕк пултарулăхĕн урокĕсене вĕрентекен Алиса Ивановна Морозова шкулти чечек клумбисен пысăк «хуçалăхне» те ертсе пырать. Унăн ĕçне лайăх енчен палăртса район администрацийĕн вĕрентÿ пайĕн Тав çырăвне парса хакларĕç.
Йÿçкассинчи вăтам тата Атапайри тĕп шкулсенчи сăнавпа опыт участокĕсенче те пурнăç пĕр вырăнта тăмасть. Пĕтĕмлетÿ тăрăх вĕсем призлă вырăн йышăннине пĕлтерчĕç.
Шкул лесничествисем пирки сăмах пуçарсан район администрацийĕн ларусен залне пухăннă шкул ачисемпе педагогсем те Юнкă шкулĕ мала тухма пултарнинчен тĕлĕнмерĕç. Ку енĕпе Раççей шайĕнче ырă ят-сум çĕнсе илнĕ Юнкăсем районта епле çĕнтерÿçĕ пулмĕç-ха; Кашмашри тĕп тата Йÿçкассинчи вăтам шкулсенчи лесничествăсен ĕçне те лайăх шая хăпартнине асăнчĕç.
Ачасене пĕлÿ панисĕр пуçне ĕçе хăнăхтарнин усси пысăккине тĕрĕсех палăртрĕ вĕрентÿ тата çамрăксен политикин пайĕн пуçлăхĕ З. Дипломатова. «Шкул территорийĕнче, шкул тулашĕнче ĕçлени ачасене биологипе географи, экономикăпа право тата экологи енĕпе те хушма пĕлÿ парать, вĕсен тавра-пĕлĕвĕ çине ырă витĕм кÿрет. Хăшĕ-пĕриншĕн тен пулас профессие суйламалли çул та пулса тăрать», – палăртрĕ Зоя Юрьевна.
Шкул ачисемпе вĕрентекенсене район администрацийĕн пуçлăхĕн пĕрремĕш çумĕ В. Ананьев та саламларĕ. Владислав Кириллович вĕрентÿ учрежденийĕсем хатĕрленĕ курав та çултан-çул пуянланса, унти экспонатсем илемленсе пынине пĕлтерчĕ. «Апла шкул ачисен ăсталăх шайĕ ÿссех пырать. Куншăн сирĕн кăмăл та хăпармалла. Кăмăл лайăх пулсан вара вĕренÿре те ĕлкĕрсе пыма çăмăлрах», – тесе хавхалантарчĕ вăл ачасене.
Савăнăçлă мероприяти хыççăн шкул ачисем район администрацийĕн çурчĕ умĕнче аслисен пултарулăхĕпе паллашма васкарĕç.
Н. Николаева.