13 октября 2012 г.
Пурăннă пулсан Болеслав Павлов спорта аталантарассинче чылай ырă пуçару тунă пулĕччĕ. Анчах та вăхăтсăр çĕре кĕнĕ. Халĕ вара спортпа туслă пулнă пиччĕшĕн ячĕпе Виталий Павлов кашни çулах мини-футбол турнирне йĕркелет.
Иртнĕ шăмат кун та Тивĕшре Болеслав Павлова асăнса мини-футбол вăййисем питĕ интереслĕ иртрĕç. Унта пилĕк команда вăй виçрĕ: «Муркаш», «Шетмĕ», Ильич ячĕпе хисепленекен хуçалăхăн команди, «МетПласт» тата Мăн Сĕнтĕр райповĕн командисем. Çумăрлă çанталăка пăхмасăрах командăсем питĕ хĕрÿ вăйăсем кăтартрĕç.
– Районти çамрăксем выляччăр тесе кăçалхи турнира Муркаш район командисене кăна хутшăнма ирĕк патăмăр. Малтанхи çулсенче пулсан кÿршĕ районсемпе хуласенчен те командăсем хутшăннă. Кăçалхипе 12-мĕш хут йĕркелерĕмĕр çак вăйăсене. Спортран аякра тăман пичче Болеслав вăхăтсăр çĕре кĕнĕ хыççăн 2000 çултанпа ирттеретпĕр мини-футбол турнирне, – пĕлтерчĕ ăмăртăва йĕркелекен Виталий Павлов.
Районти командăсенче çамрăксем кăна мар, ветерансем те пуррине ырламалла. «Ăруран ăрăва» тени спортра та пулмаллах.
Çумăра пула футбол хапхисем умĕнчи çĕр самаях çăрăнса пĕтнĕ, мечĕкĕ, паллах, пылчăклă, ÿкес пулсан та футболистсем йĕпе те таса мар курăк çине ÿкеççĕ... – акă вăл футбола чăнласах парăннă арçынсен вăййи тата командăсем хăйсен пуçарулăхĕпе ăмăртăва хутшăнни. Хушу мелĕпе хутшăнакансемшĕн ăмăрту яланах кичем иртет, Тивĕшре вара ăшă кăмăл, савăнăç хуçаланчĕ.
Çак вун иккĕмĕш хут иртнĕ ăмăртура «МетПласт» команда çĕнтерчĕ, 2500 тенкĕ укçан парнене тивĕçрĕ. 2-мĕш вырăна тухнă Мăн Сĕнтĕр райповĕн команди 2000 тенкĕ, 3-мĕш вырăнти Ильич ячĕпе хисепленекен хуçалăхăн команди 1500 тенкĕ хавхалану парнисене тивĕçрĕç. Призлă вырăн йышăнайманнисене те 500-шер тенкĕ парса хавхалантарчĕ Виталий Павлов – 12 çул хăйĕн пиччĕшĕн сăнарне асра тытса ирттерекен ăмăртусен улшăнми йĕркелÿçи тата спонсорĕ.
Н. Николаева.