10 октября 2012 г.
Çамрăк спортсменсене хавхалантаракан савăнăçлă ăмăрту Тойкилтĕре кăçалхипе тăваттăмĕш хут иртрĕ. Муркашри тĕп больницăн тĕп врачĕн В. Даниловăн парнисене çĕнсе илме 14 команда пухăнчĕ.
Владислав Григорьевич Тойкилтĕ шкулне пĕтернĕ. Шкул вăхăтĕнчех спорта килĕштернĕрен кайран та вăл спортран аякра тăман. Тепĕр тесен спортпа туслă мар çын çакăн пек ăмăрту йĕркелемен те пулĕччĕ.
«Пурте спортсмен пулаймасть, паллах. Анчах эсир кунта ăмăртма килни те çĕнтерÿ. Мала тухма пултарнисем те, финиша каярах çитекенсем те паян хăйсем валли ума çĕнĕ тĕллевсем лартĕç. Спортпа туслисем вара тĕллевсене яланах пурнăçлама пултараççĕ. Çавăнпах мĕн пĕчĕкрен спортпа туслă пулăр», – тенипе пĕрлех Владислав Григорьевич хаклă парнесем хатĕрленине те, спонсорсем чылай пулнине те палăртрĕ.
Спонсорсем кăçалхи ăмăртура чăнах та нумаййăн пулчĕç: районти массăллă спорта аталантарассинчен нихăçан та аякра тăманскерсем, ку ăмăртăва та парнесемпе килнĕ. Вĕсем: «Моргаушскавтотехсервис» ертÿçи Л. Дмитриев, «Заря» пĕрлешÿ ертÿçи П. Терентьев, Муркаш пасарĕн директорĕ Е. Субботин, Москакассинчи пасар директорĕ Г. Михайлов, «Моргаушское» пурăнмалли çурт-йĕрпе коммуналлă хуçалăх директорĕ С. Тимофеев, В. Егорова ячĕллĕ спорт шкулĕн директорĕ А. Сидюшкин, «БТИ» предприяти ертÿçи В. Калинин, «Россельхозбанкăн» Муркашри хушма офисĕн ертÿçи И. Павлова, «Ачасемпе çамрăксен спорт шкулĕ – «Сывлăх» ФСК» учреждени директорĕ А. Куликов, Хорнуй ял тăрăхĕн пуçлăхĕ М. Колесникова.
Парнесем чылайччĕ. Ăмăрту пуçланичченех Владислав Григорьевич хăйĕн тăван шкулне тĕрлĕ мечĕксем парнелерĕ. Ачасене саламланă май район администрацийĕн пуçлăхĕ Р. Тимофеев çакна каласа хăварчĕ: «Кашни шкулăн кун пек выпускниксем çук. Акă, сăмахран, Владислав Григорьевич мечĕксем те кашни çулах парнелет, сывă пурнăç йĕркине тытса пыма хистет. Çакă питĕ лайăх. Сывлăхлă ăру ÿсни вара пирĕншĕн пуриншĕн те пĕлтерĕшлĕ», – терĕ.
Ку ăмăртура акă 1–5-мĕш вырăнсене тухнă шкулсен командисем пурте волейбол мечĕкĕсене тивĕçрĕç. В. Даниловăн хĕрĕ Марина Владиславовна вара кашни командăна пылак парне – тортсем – парса хавхалантарчĕ.
Старта чи малтан уйрăм ÿсĕмпе тухнă шкул çулне çитмен пĕчĕк ачасене те (вĕсенчен чи кĕçĕнни 2008 çулта çуралнă Ксения Толстова пулчĕ) финишра Владислав Григорьевич кашнинех шăккалатсемпе тата ятарлă парнесемпе кĕтсе илчĕ. Пĕрремĕш хавхалантару çапла пулмалла та ĕнтĕ. Каярах вара вĕсен çитĕнĕвĕсене те сăнама май пулĕ.
Чи хăвăрт чупакансене – Калайкассинчи вăтам шкулти Стас Ершова тата Муркашри вăтам шкулта вĕренекен Анна Милютинăна асăнмалăх кроссовкисем парнелерĕç.
2002 çулта çуралнисен тата кĕçĕнреххисен стартĕнчен пуçласа аслă ÿсĕмрисем таранах уйрăм чупусем иртрĕç. Вĕсене сăнама питĕ кăмăллă пулчĕ.
Финиш хыççăн ачасем шкул столовăйĕнче вĕри апат çиме пултарчĕç. Ăмăртăва килекенсене шкул алăкĕ умĕнче çăкăр-тăварпа ăшшăн кĕтсе илекен Тойкилтĕсем çапла хăналани тĕлĕнтермерĕ те, вĕсен ăшă кăмăлне тепĕр хут палăртрĕ çеç.
Командăсенчен çĕнтерÿçĕ ятне Çатракассинчи вăтам шкул илме тивĕç пулчĕ. 2-мĕш вырăнта – Муркаш шкулĕ, 3-мĕш Ярапайкассисем пулчĕç. Призлă вырăн йышăннисене грамотăсемпе парнесем парса чысларĕç. Ыттисем вара çитес ăмăртăва лайăхрах хатĕрленме шантарчĕç.
Н. Николаева.