18 апреля 2012 г.
«Интерфакс» пĕлтернĕ тăрăх, РФ Патшалăх Думи Çĕнĕ çул уявĕн кунĕсем шучĕпе май уйăхĕн уявне 2 кун чухлĕ вăрăмлатассипе саккун проектне çирĕплетнĕ.
Ĕç кодексне кĕртекен улшăнусене апрелĕн 10-мĕшĕнче иккĕмĕшпе виççĕмĕш вулавпа харăсах пăхса тухнă. Çапла вара хĕллехи каникул кунĕсем 10 кун вырăнне 8 кун юлĕç, январĕн 1-мĕшĕнчен тытăнса январĕн 8-мĕшĕччен пырĕç. Икĕ кунне вара Раççей Правительстви Çĕнĕ çулччен пĕр уйăхран кая юлмасăр кирек хăш патшалăх уявĕ çумне хушса парĕ.
«Эпир шухăшланă тăрăх çак кунсенчен хăшĕ кану кунĕсене çывăхраххине тата каникул йĕркелеме май пуррине кура е майăн 1-мĕшĕ, е майăн 9-мĕшĕ пулмалла», – тенĕ ĕç, социаллă политика тата ветерансен ĕçĕсен комитечĕн пуçлăхĕ Андрей Исаев.
2012 çулта май уйăхĕнче кану кунĕсем 1, 6, 7, 8 тата 9-мĕшĕсем пулĕç. Вĕсем çумне тата апрелĕн 29-пе 30-мĕшĕсем хушăнаççĕ. Кăçал вара Çĕнĕ çул уявĕ январĕн 1-мĕшĕнчен тытăнса 10-мĕшĕччен пынăччĕ.