18 января 2012 г.
Халĕ экономикăн тĕрлĕ отраслĕсенче тата бюджет сферинче ĕçлекен çамрăк специалистсем, çамрăк çемьесем пурăнмалли çурт тума е хваттер туянма пултараççĕ. Çак пысăк ĕçе пурнăçлама патшалăх шайĕнче те пулăшаççĕ: тĕрлĕ программа ĕçлет.
Акă иртнĕ çулхи октябрĕн 3-мĕшĕнче республикăра «Пурăнмалли çурт-йĕр условийĕсене лайăхлатас енĕпе пулăшмалли хушма мерăсем çинчен» Указ вăя кĕчĕ. Указпа килĕшÿллĕн çамрăк çемьесем ипотека кредитне çурт-йĕр туянма е тума ярсан кредит килĕшĕвне тунă кунран пуçласа 10 çул таранччен процентсен пĕр пайне (4 процент чухлĕ) республика бюджетĕнчен саплаштараççĕ.
Район администрацийĕн капиталлă строительство, архитектура тата пурăнмалли çурт-йĕрпе коммуналлă хуçалăх управленийĕнчен пĕлтернĕ тăрăх çак Указа пурнăçласси пирĕн районта та йĕркене кĕрсе çитнĕ: 9 çамрăк çемье республика шайĕнчи çăмăллăхпа усă курма тытăннă та ĕнтĕ.
Çак пулăшупа мăшăр 35 çултан аслă мар çемьесем, ашшĕ е амăшĕ 35 çул тултарман тата пĕрре е ытларах ачаллă тулли мар çемьесем, вĕсем пурăнмалли çурт-йĕр условийĕсене лайăхлатма вырăнти хăй тытăмлăх органĕнче черете тăнă пулсан усă курма пултараççĕ. Çавăнпа та республика шайĕнчи пулăшу пирки тĕплĕнрех ял тăрăхĕсен администрацийĕсенче ыйтса пĕлме пултаратăр.
Н. Николаева.