19 октября 2011 г.
Ильинкăра чиркÿ пулатех
Ырă çанталăк тăнă иртнĕ шăмат куна Ильинкăра пурăнакансем ырă ĕç пурнăçлассине халалларĕç. Кунта чиркÿ хăпартассипе тимлеççĕ. Вăл малтанхи святой Илия пророк чиркĕвĕ пулнă вырăнтан инçе мар вырнаçнă.
Таврари çичĕ ялти çирĕм çынпа пĕрле субботника Муркашри Владимир Турă Амăшĕн турăшĕн чиркĕвĕн настоятелĕ Федор атте те хутшăнчĕ. Строительство ĕçĕпе паллашнă май вăл алтаре тĕрĕс йĕркелессипе вырăнлă та кирлĕ сĕнÿсем пачĕ.
Чиркĕве хăпартма пуçланă: вырăнти халăх тата спонсорсем пулăшнипе унăн стенисем икĕ метртан çÿллĕрех çĕкленнĕ ĕнтĕ. Çак пархатарлă ĕçе ертсе пыраканĕ депутатсен районти Пухăвĕн депутачĕ В.И. Кожанов пĕлтернĕ тăрăх хĕллеччен стенасене палăртнă таран хăпартса çурта çивиттипе витесшĕн. Мĕн пăхса хунине пурнăçлама вара ĕçлекенсем тата строительство материалĕсем туянма тепĕр 200 пин тенкĕне яхăн кирлĕ. Сивĕсем пуçланиччен ĕçе вĕçлесен, паллах, лайăх. «Çавăнпа та Ильинка ял тăрăхĕнче пурăнакансен те, пархатарлă ĕçе хутшăнас кăмăллă ытти вырăнта пурăнакан çынсен те, спонсорсен пулăшăвĕ те питĕ вырăнлă пулмалла», – палăртать Валерий Иванович.
Субботника акă депутатсен районти Пухăвĕн депутачĕсем А.Н. Ивановпа «Моргаушская» чăх-чĕп фабрикин ертÿçи Н.Г. Ванеркин та хутшăнчĕç. Николай Григорьевич маларах Шатракасси чиркĕвне хута яма нумай пулăшнăскер, халĕ те фабрика енчен пулăшу пуласса шантарчĕ.
Вырăнта чиркÿ пулни кунта пурăнакан çамрăксене те, аслăрах ÿсĕмрисене те пурнăçри вырăна тупма пулăшĕ. Çакна ытти ялсенчи опыт та кăтартса парать. Апла пулсан Святой Илия пророк чиркĕвне хута ярассипе те пулăшакансем татах тупăнасса ял тăрăхĕнчи çынсем шансах тăраççĕ. Çак кунсенче пулăшу пулсан татах та аван.
Чиркÿ ĕçлеме пуçласан вара кунта шăмат кунсерен служба вăхăтĕнче пулăшакансен сывлăхĕпе тăнăçлăхĕшĕн кĕлĕ ирттерме палăртнă.
В. ЛАВРЕНТЬЕВ.