19 октября 2011 г.
Йывăрлăхран тухса пыратпăр
Районти ял хуçалăх производство кооперативĕсемпе хресчен (фермер) хуçалăхĕсенче паян пĕтĕм ĕç вăйне «иккĕмĕш çăкăр» кăларса пухса кĕртес ĕçе явăçтараççĕ. Юр айне пулмĕ-и-ха çĕр улми; Çак ыйту çине хурав шыраса район администрацийĕн пуçлăхĕн пĕрремĕш çумĕпе, ял хуçалăх пайĕн ертÿçипе В.А. КАЛИНИНПА тĕл пулса калаçрăм.
– Куç шăрçине сыхланă пек пăхса ÿстернĕ кашни культурăна хиртен пÿлмесене кĕртсе хурасси – çĕр ĕçченĕ умĕнче тăракан пирĕн пĕрлехи тĕллев. Çакна ăнланса хуçалăхсен ĕçченĕсем те, вĕсене пулăшас ĕçрен пăрăнманнисем те кулленех çĕр улми пуссисене тухаççĕ. Нумай çĕрте йĕпе-сапана пăхмасăрах çĕр улми кăлармалли комбайнсем ĕçлени пĕрлехи тăрăшулăха çăмăллатни патне илсе пырать. Çĕр улмине çухатусăр пуçтарса илесси паян пысăк ыйтуллă пулин те ăна пурнăçа кĕртме пултарасса эпир ĕненетпĕр, – терĕ Владимир Аркадьевич ман ыйтăва ăнланса.
– Çĕр ĕçченĕсене пулăшас ĕçрен пăрăнманнисем тесе камсене палăртатăр;
– Район администрацийĕнче вăй хуракансем, районти тĕп больницăра, выльăх чирĕсемпе кĕрешекен станцире ĕçлекенсем халĕ кунсерен «Ударник», «Свобода» хуçалăхсене пулăшма çÿреççĕ.
– Кăларман çĕр улми чылай-и;
– Оперативлă кăтартусемпе татах 187 гектар. Хальлĕхе тивекен вăтам тухăç гектар пуçне 118 центнер.
А. БЕЛОВ калаçнă.