08 октября 2011 г.
Хастар ĕçлеме хавхалантару пур
Районти чи пултаруллă учительсем, педагогика ĕçĕн ветеранĕсемпе тин çеç шкулта ĕçлеме тытăннă çамрăк специалистсем Учитель кунне уявлама октябрĕн 5-мĕшĕнче Муркаша пухăнчĕç. Уявра сумлă хăнасем учитель ĕçĕ пирки нумай ырă сăмах каласа паян учитель майлă патшалăх мĕнле утăмсем туни çинче чарăнса тăчĕç.
Чăваш Республикин Патшалăх Канашĕн Председателĕн çумĕ В. Мидуков акă вĕрентÿ сферине «Вĕрентÿ» нацпроектпа пăхнисĕр пуçне патшалăх татах та 120 миллиард тенкĕ уйăрнине пĕлтерчĕ. Кунсăр пуçне кăçал учительсен ĕç укçи те палăрмалла ÿсрĕ. Апла пулсан вĕрентÿ учрежденийĕсене юсаса çĕнетесси пирки, учительсен ĕç укçине ÿстересси пирки каланисем пушă сăмахсем мар.
Чăваш Республикинчи хăй тĕллĕн çÿрекен машинăсене тата ытти техникăна техника тĕлĕшĕнчен сăнаса тăракан Патшалăх инспекцийĕн пуçлăхĕ В. Димитриев М. Игнатьев Президентăн указĕпе паллаштарчĕ. Çитес çултан республикăри «Чи лайăх учитель», «Чи лайăх воспитатель» тата «Чи лайăх класс ертÿçи» конкурссен çĕнтерÿçисем Чăваш Республикин пуçлăхĕн хавхалантару укçине тивĕçеççĕ: 150 пин тенкĕ, 100 пин тенкĕ тата 50 пин тенкĕ.
Район администрацийĕн пуçлăхĕ Ю. Иванов учительсене саламласа чи хастаррисене район администрацийĕн Хисеп грамотипе наградăларĕ. Вĕрентÿ, çамрăксен политики тата физкультурăпа спорт пайĕн ертÿçи З. Дипломатова çулсерен олимпиадăсенче мала тухакан вĕренекенсем хатĕрлекен учительсене уйрăммăн палăртса Тав хучĕсемпе чысларĕ. Çак тăрăшуллă учительсене тата кăçал шкулсене ĕçлеме килнĕ çамрăк специалистсене валли вĕрентÿ пайĕ парне те хатĕрленĕ: ФСК директорĕ А. Куликов учительсене сывлăха çирĕплетме çÿреме абонементсем парнелерĕ.
Уяв шкул ачисем тăрăшнипе савăк юрă-ташăсăр иртмерĕ. Вĕрентÿ, çамрăксен политики тата физкультурăпа спорт пайĕ çумĕнчи попечительсен канашĕн ертÿçи – «Моргаушская» чăх -чĕп фабрики» акционерсен уçă обществин генеральнăй директорĕ Н. Ванеркин – учитель ĕçĕн сумлăхĕ пирки аса илтерсе районти педагогсене тав сăмахĕ каларĕ. В. Мидуковпа пĕрле вăл Шупашкартан парне илсе килнине пĕлтерчĕ: сцена çинче «Янташ» ушкăн юррисем янăрарĕç.
Н. АНДРЕЕВА.